Իջևանում նորածնի մահվան համար մեղադրանք է առաջադրվել մանկաբարձ-գինեկոլոգին. Փաստինֆո

Իջևանի բժշկական կենտրոնում նորածնի մահվան դեպքի առթիվ քննվող քրեական գործով մեղադրանք է առաջադրվել նույն բժշկական կենտրոնում աշխատող մանկաբարձ-գինեկոլոգ Վ.Ասիլբեկյանին։

Ինչպես արդեն տեղեկացրել ենք՝ նորածնի մահվան մասին ահազանգը ստացվել է 2017 թվականի հուլիսի 14-ին։ Ծննդկանի մայրը հայտնել էր, որ դուստրը 2017 թվականի հուլիսի 14-ին ծննդաբերել է «Իջևան ԲԿ» ՓԲԸ-ի ծննդատանը, որից ժամեր անց բժիշկները հայտնել են, որ նորածինը մահացել է:
Դեպքի առթիվ 2017թ. հուլիսի 15-ին ՀՀ քննչական կոմիտեի Տավուշի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասով, որի շրջանակներում բժշկական կենտրոնից առգրավվել անհրաժեշտ բժշկական փաստաթղթերը և նորածնի մահվան ու քրեական գործի համար էական նշանակություն ունեցող մի շարք այլ հանգամանքներ պարզելու համար նշանակվել դիակի դատաբժշկական փորձաքննություն:

Փորձաքննությամբ տվյալներ են ձեռք բերվել բժշկական սխալի մասին, բացի այդ՝ պարզվել է, որ բժշկական կենտրոնում փորձ է կատարվել նաև փաստաթուղթ կեղծել՝ ծննդաբերության պատմությունում կեղծ գրառումներ կատարելով։

«Փաստինֆո»-ի հաղորդմամբ՝ նախաքննական մարմինը մեղադրանք է առաջադրել երկու հոգու՝ մանկաբարձ-գինեկոլոգին եւ բաժանմունքի վարիչին։
Նախնական քննության տվյալներով՝ մանկաբարձ-գինեկոլոգը 14.07.2017թ Իջևան քաղաքի բնակչուհու ծննդաբերության ընթացքում իր մասնագիտական պարտականությունները կատարել է ոչ պատշաճ՝ դրանց նկատամբ դրսևորելով անփույթ վերաբերմունք ։ Բացի այդ՝ համաձայնության գալով Իջևան բժշկական կենտրոն ՓԲԸ-ի մանկաբարձագինեկոլոգիայի բաժանմունքի վարիչի հետ, հանցավոր արարքը թաքցնելու և պատասխանատվության չենթարկելու նպատակով, պատասխանատվությունից ազատող պաշտոնական այլ փաստաթուղթ հանդիսացող ծննդաբերության պատմության մեջ ակնհայտ կեղծ գրառումներ են կատարել։

Մանկաբարձ գինեկոլոգին մեղադրանք է առաջադրվել ՀՀ քրեական օրենսգրքի երկու հոդվածով՝ 130-րդ հոդվածի 2-րդ մասով՝ բուժաշխատողի կողմից մասնագիտական պարտականությունները ոչ պատշաճ կատարելը, որն առաջացրել է մահ, եւ 325-րդ հոդվածի 2-րդ մասով՝ մի խումբ անձանց կողմից նախնական համաձայնությամբ փաստաթուղծ կեղծելը, իսկ բաժանմունքի վարիչին միայն 325-րդ հոդվածի 2-րդ մասով։
Նրանց նկատմամբ որպես խափանման միջոց է ընտրվել ստորագրություն չհեռանալու մասին։

Քրեական գործն ուղարկվել է դատարան, որը կքննվի դատավոր Ռաֆիկ Մելքոնյանի նախագահությամբ։

Աղբյուրը` «Փաստինֆո»