Լարին կտրուկ արժեզրկվել է. ի՞նչ պետք է իմանան Վրաստան մեկնող զբոսաշրջիկները

Վրացական լարին նորից ռեկորդային չափով արժեզրկվել է. Վրաստանի ազգային բանկի տվյալներով՝ ԱՄՆ 1 դոլարն արդեն արժե 2.7945 լարի: Ընդ որում, միայն նախորդ օրը ազգային արժույթի փոխարժեքը կազմել է 1 դոլար՝ 2. 7798 լարիի նկատմամբ: Մինչ այժմ լարիի ռեկորդային անկումը գրանցվել էր 2019-ի մայիսի 28-ին, երբ դոլարը արժեր 2,7876 լարի: Կարճ ասած՝ 1 լարին 200 դրամից հասել է 163 դրամի։

ԼՈՒՐԵՐ․com-ի հետ զրույցում վրացագետ Ալիկ Էրոյանցը նշեց, որ լարիի արժեզրկումը նորություն չէր և վերջին տարիներին տենդենցը կար․ «Լարին մշտապես անկում է ապրել։ Նույնիսկ ժամանակին արդեն  պաշտոնաթող վարչապետ Բիձինա Իվանիշվիլին էր դրա մասին խոսել և Կենտրոնական բանկի նախագահությանը մեղադրել ու քննադատել այդ հարցում։ Նա նույնիսկ գովել էր այդ ժամանակ Հայաստանում առկա իրավիճակը տվյալ ոլորտում։ 

Լարիի արժեզրկումը բնականաբար ազդում է շարքային քաղաքացու կամ սպառողի վրա և, իհարկե, այս ամենը ոչ մի դրական վերաբերմունքի չի արժանացնելու իշխանություններին, ինչն առկա էր վերջին տարիներին և հանրության մեջ բողոք կար, մեղադրում էին գործող իշխանություններին։ Հատկապես այս լարված իրավիճակում ցանկացած այլ գործոն կարող է խաթարել մթնոլորտը սոցիալական, տնտեսական հարթակում, ինչը բերելու է լարվածության ուժգնացման։ Քաղաքական ու ռուսատյացության խնդրի ֆոնին լարիի արժեզրկումը ավելի է երկարատև դարձնելու ներքաղաքական ճգնաժամը»,- կարծիք հայտնեց Էրոյանցը։

Անդրադառնալով հարևան երկրի գումարի արժեզրկման ազդեցությանը Հայաստանի վրա` վրացագետն ասաց․ «Զբոսաշրջիկներն, ովքեր մեկնում են Վրաստան հանգստանալու, դոլարը լարիով փոխանակելու դեպքում շատ ավելի մեծ գումար կստանան որպես լարի և իրենց համար ծախսերն ավելի մատչելի են դառնում։ Թեև նկատենք, որ այս ֆոնին հյուրանոցներն իրենց գները բարձրացրել են։ Սակայն վերջին լարվածությունը բերեց նրան, որ շատ ռուսաստանցի զբոսաշրջիկներ, որոնք պատրաստվում էին ամառն անցկացնել Վրաստանում, տեղեկություն կա, որ նրանց մի մասը հրաժարվել է ամրագրված հյուրանոցներից»,- նշեց նա։

Ըստ վրացագետի` թեև այս տեսանկյունից մեր հայրենակիցների համար կարող է ձեռնտու լինել, սակայն, ընդհանուր առմամբ, որքան իրավիճակը քաղաքական լարվածության, սոցիալ-տնտեսական առումով ցանկալի չէ Վրաստանի համար, ցանկալի չէ նաև Հայաստանի համար։ Նրա խոսքով՝ որքան ավելի զարգացած տնտեսություն ունենա մեր հարևան երկիրը, մեզ համար դա շատ ավելի շահավետ է։

Սոնա Հարությունյան