Պաշտոնյան չի բացառում անօրինական գերեզմանների տեղափոխումը (տեսանյութ)

Երևանի քաղաքապետարանն ահազանգում է դեպքերի մասին, երբ քաղաքացիները հուղարկավորություն են կազմակերպում գերեզմանոցների հարակից հատվածներում, ինչն օրենքով արգելված է:  Երևանի քաղաքապետարանի «Բնակչության հատուկ սպասարկում» ՀՈԱԿ-ի Արման Իսկանդարյանը հնարավոր է համարում, որ օրենքի ուժով ինչ-որ մի օր այդ գերեզմանները ենթակա լինեն տեղափոխման։ Այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից։

«Մայրաքաղաքում 21 գերեզմանատուն կա: Դրանցում տարածքների հատկացման և ոլորտին առնչվող մյուս գործառույթներով զբաղվում է Երևանի քաղաքապետարանի «Բնակչության հատուկ սպասարկում» ՀՈԱԿ-ը:

Չնայած նրան, որ 21 գերեզմանատներն ունեն իրենց հստակ սահմանված տարածքները, կան դեպքեր, երբ քաղաքացիները հուղարկավորություն են կազմակերպում դրանց հարակից հատվածներում, ինչն օրենքով արգելված է: 

«Ունենք նախադեպ, երբ Դավթաշենի գերեզմանատան հարակից շուրջ 1 հա տարածքը 2012թ. գրավադրվել է բանկերից մեկում, որտեղ կան նաև գերեզմանատեղեր: Հիմա քննչական վարույթ է իրականացվում: Մարդիկ իրենց սեփական հողատարածքներում թե ինչ ճանապարհով, չեմ կարող ասել, բայց թույլատրել են հուղարկավորություն կատարել,  որն անօրինական է»,- նշում է կազմակերպության տնօրեն Արման Իսկանդարյանը:

Բոլորովին վերջերս անօրինական հուղարկավորության դեպք է գրանցվել նաև «Քանաքեռ» գերեզմանատան հարակից տարածքում:

«Շատ հնարավոր է, որ օրենքի ուժով ինչ-որ մի օր այդ գերեզմանները ենթակա լինեն տեղափոխման: Կոչ եմ անում մեր բոլոր բնակիչներին՝ զերծ մնալ նմանօրինակ հողային ձեռքբերումներից: Օրինական ճանապարհը միայն «Բնակչության հատուկ սպասարկում» ՀՈԱԿ-ի տրամադրվելիք տարածքներն են, որոնք, ի դեպ, բացառապես տրամադրվում են անվճար»,- նշում է կազմակերպության տնօրեն Արման Իսկանդարյանը:   

Վարչական իրավախախտումների վերաբերյալ ՀՀ օրենսգրքով՝ սահմանված տարածքներից դուրս հուղարկավորություն կազմակերպելու համար նախատեսված են տույժեր:

Ընթացիկ տարում Աջափնյակ վարչական շրջանում նոր տարածք կհատկացվի համայնքային գերեզմանատան համար: Միասնական մոտեցում ցուցաբերելու նպատակով քաղաքապետարանը նախատեսում է օրենսդրական փոփոխությունների առաջարկությամբ հանդես գալ: Համյանքային նոր գերեզմանատանը հուղարկավորությունների ու գերեզմանատեղերի համար կսահմանվեն միանման չափորոշիչներ»,- նշված է հաղորդագրության մեջ: