Կարկուտն եկավ-տարավ սաղ. Շիրակի մարզի գյուղացիները շվարած են
Հասարակություն
«Վարկով միլիոններ ենք վերցրել՝ ցորենի, կարտոֆիլի սերմ ենք առել-ցանել, կարկուտն եկավ-տարավ սաղ: Էդ գումարը գնաց-կորավ, վարկերն էլ, չգիտենք՝ ոնց ենք մարելու: Ի՞նչ ծախենք, որ փակենք էդ գումարները: Եթե պետությունը միջոցներ չձեռնարկի՝ ինչքան տեխնիկա կա՝ կհանենք, փողոցը կփակենք»,- բողոքում են գյուղացիները:
ԼՈՒՐԵՐ.com-ի հետ զրույցում Գեղանիստ համայնքի ղեկավար Աղասի Ղազարյանն ասաց, որ կարկուտը մոտ 200 հեկտարում 100 %-ի չափով վնասել է բերքը. «Ջրառատի, Փանիկի սահմանով կարկուտը բերքը լրիվ տարել է: Մարդիկ կան, որոնց մինչև անգամ 20 հեկտար ցանքը վնասվել է: Մենք դիմել ենք մարզպետարան, համապատասխան մասնագետներ են եկել: Հանձնաժողով ենք կազմել, ցուցակներով արձանագրում ենք, թե գյուղացիներից ով ինչ ցանքատարածություններ ունի, որքան վնաս է կրել, որպեսզի ներկայացնենք մարզպետարանին: Սերմացուն, պարարտանյութը գյուղացիները վարկերով են գնել, դժվար կացության մեջ ենք՝ տեսնենք կառավարությունն ինչ կորոշի»,- դժգոհեց Ղազարյանը:
Մեզ հետ զրույցում Ախուրյան համայնքի ղեկավար Արծրունի Իգիթյանն էլ ասաց, որ իրենց խոշորացված համայնքում ամենից շատ Կամո, Կառնուտ, Հովիտ, Բասեն, Ջրառատ, Ախուրյան բնակավայրերն են տուժել. «Հանձնաժողովը ուսումնասիրություն է արել, այս պահին վնասի չափերն է պարզում: Մնացածը կառավարությունը կորոշի, ցանկալի է՝ փոխհատուցի: Մարդիկ շվարած են, տարվա սպասելիքը ջուրն է լցվել»,- նշեց Իգիթյանը:
ՈՒՂԻՂ ԵԹԵՐ
Ամենադիտված 
Խստորեն դատապարտում եմ Ռուբեն Ռուբինյանի կողմից Ստամբուլում թուրք տեսած լինելը. Դանիել Իոաննիսյան
