Երևան-Սևան ճանապարհին տեղի ունեցած վթարից տուժած երեխաների վիճակը գնահատվում է միջին ծանրության

«Սուրբ Աստվածամայր» բժշկական կենտրոնի մամուլի քարտուղար Գևորգ Դերձյանը ֆեյսբուքյան իր էջում գրել է.

«Գիշերը վթարից տուժած 9-ամյա երկու երեխաների առողջության մասին

Հունիսի 30-ին, ողբերգական ավտովթար է տեղի ունեցել Կոտայքի մարզում: Ժամը 03:30-ի սահմաններում Երևան-Սևան ավտոճանապարհի 40-րդ կմ հատվածում ճանապարհային ոստիկանության չգործող անշարժ պահակետի հարևանությամբ բախվել են Volkswagen և BMW X5 մակնիշի ավտոմեքենաները:

Վթարի հետևանքով Երևանի բնակիչ, 26-ամյա Դավիթ Մանուկյանը, BMW-ի վարորդ Հ. Հայրապետյանը, նրա ուղևորները՝ 64-ամյա Անյուտա Մովսիսյանը, 9-ամյա Նարեկ Սաֆարյանը, 9-ամյա Ալիսա Սաֆարյանը մարմնական վնասվածքներով տեղափոխվել են Հրազդանի բժշկական կենտրոն, իսկ 3 հոգի տեղում մահացել են:

9-ամյա երկու երեխաներն արդեն լուսաբացին տեղափոխվել են Երևան՝ Սուրբ Աստվածամայր բժշկական կենտրոն: Տղա երեխայի մոտ կա փակ գանգուղեղային վնասվածք, գլխուղեղի ցնցում, աջ ազդրի կոտրվածք՝ տեղաշարժով: Ներկա պահին ձգում է դրվում, կտեղափոխվի վնասվածքաբանական բաժին:

Աղջկա մոտ գրանցվել է փակ գանգուղեղային վնասվածք, գլխուղեղի ցնցում: Նա նույնպես կտեղափոխվի համապատասխան բաժանմունք:

Երեխաները գտնվում են Սուրբ Աստվածամայր ԲԿ-ի բժիշկների խիստ հսկողության ներքո: Երկուսի վիճակն էլ գնահատվում է միջին ծանրության»:

Հիշեցնենք, որ Երևան-Սևան ավտոճանապարհին տեղի է ունեցել ողբերգական ավտովթար, 3 հոգի մահացել է, 5-ը՝ հոսպիտալացվել: Իսկ վիրավորներից 2-ը երեխաներ են։