Արթուր Գոյունյանը մասնակցել է ԱՊՀ պետությունների ՔԿԾ ղեկավարների խորհրդի միջազգային համաժողովին

Ռուսաստանի Դաշնության Ռյազան քաղաքում՝ Ռուսաստանի պատիժների կատարման դաշնային ծառայության ակադեմիայում, նոյեմբերի 20-ից 22-ը, տեղի է ունեցել «Հանցագործություն, պատիժ, ուղղում» խորագրով միջազգային 4-րդ պենիտենցիար համաժողովը, որին մասնակցել է նաև Հայաստանի Հանրապետության արդարադատության նախարարության քրեակատարողական ծառայության պետ, արդարադատության գեներալ-մայոր Արթուր Գոյունյանը: Այս մասին հայտնեցին Քրեակատարողական ծառայության հանրային կապերի բաժնից:

Համաժողովի հիմնական նպատակներն են եղել Ռուսաստանի Դաշնության և այլ երկրների քրեակատարողական ծառայությունների ներկայացուցիչների ու քրեական պատիժների կատարման հարցերով զբաղվող գիտական միությունների համար երկխոսության միջազգային հարթակի ձևավորումը, ինչպես նաև համաշխարհային փորձի հիման վրա դատապարտյալների հետ աշխատանքի հեռանկարային նոր մեթոդների մշակումն ու կենսագործումը։

Համաժողովի շրջանակներում տեղի է ունեցել գործնական հանդիպում ՀՀ ԱՆ քրեակատարողական ծառայության պետ Արթուր Գոյունյանի և Ռուսաստանի պատիժների կատարման դաշնային ծառայության տնօրեն Ալեքսանդր Կալաշնիկովի միջև, որի ժամանակ պայմանավորվածություն է ձեռք բերվել համագործակցությունն առավել առարկայական ու արդյունավետ դարձնելու, ինչպես նաև ուսումնական կադրերի արդիական վերապատրաստման վերաբերյալ: Քննարկվել են նաև անվտանգության ու պահպանության ոլորտներում՝ տարիների ընթացքում ձեռք բերված աշխատանքային լավագույն միջոցների փոխանակմանը վերաբերող հարցեր:

Քրեակատարողական ծառայության պետն առանձնազրույց է ունեցել նաև Ռուսաստանի պատիժների կատարման դաշնային ծառայության ակադեմիայի պետ Ալեքսանդր Կրիմովի հետ, որի ընթացքում քննարկվել են երկու պետությունների քրեակատարողական ոլորտների ներկայացուցիչների միջև փորձի փոխանակմանն առնչվող հարցեր։

Համաժողովի ավարտին ՀՀ ԱՆ քրեակատարողական ծառայության պետ Ա. Գոյունյանը Ռուսաստանի պատիժների կատարման դաշնային ծառայության ակադեմիայի 85-ամյակի կապակցությամբ պարգևատրվել է հոբելյանական մեդալով:

Նշենք, որ համաժողովը նվիրված էր նաև Ռուսաստանի պատիժների կատարման դաշնային ծառայության ակադեմիայի 85 և Ռուսաստանի քրեակատարողական համակարգի 140-ամյակներին: