Աղմկահարույց տեսանյութում ծեծելով ցուցմունք կորզողներից երկուսը ոստիկանության նախկին աշխատակից են․ մանրամասներ

Աղմկահարույց տեսանյութում երևացող ոստիկաններից երկուսը, որոնք բռնի ուժով ցուցմունք էին կորզում, ոստիկանության նախկին աշխատակիցներ են։ Այս մասին հայտնում է ոստիկանության պաշտոնական կայքը։

«Իրականացվող ծառայողական քննության շրջանակներում տեղեկություններ են ձեռք բերվել տեսանյութում երևացող անձանցից երեքի ինքնության վերաբերյալ։ Նրանցից մեկի լիազորությունները կասեցվել են, իսկ երկուսը ոստիկանության նախկին ծառայողներ են»,- հայտնում են ոստիկանությունից։

Ծառայողական քննությամբ ձեռք բերված բոլոր տվյալները փոխանցվել են Հատուկ քննչական ծառայություն։

Հիշեցնենք, որ համացանցում տարածված տեսանյութի առնչությամբ, որտեղ երևում է, թե ինչպես են քրեական հետախուզության ծառայողները բռնի ուժով ցուցմունք կորզում, ոստիկանության Ճամբարակի բաժնի պետ Նարեկ Սիմոնյանի լիազորությունները ժամանակավորապես դադարեցվել են։

ՀՔԾ պետ Սասուն Խաչատրյանն էլ այսօր հայտնել էր, որ դեպքը տեղի է ունեցել 2008-10 թթ. և այդ ժամանակ խոշտանգման համար պատասխանատվություն նախատեսող հոդվածն ընդունված չէր (309 պրիմ 1)։