6% հարկը մարդկանց առողջ պահելու համար է. նախկին փոխնախարար

«Հայաստանում առողջության համապարփակ ապահովագրության ներդրման հայեցակարգ» անվանումով նախագիծը հանրության շրջանում բուռն քննարկումների առիթ է: Առողջապահության նախարարն առաջարկում է Հայաստանում սահմանել առողջապահության հարկ՝ աշխատավարձի 6 տոկոսի չափով: Նախագծի մասին ԼՈՒՐԵՐ.com-ի թղթակիցը զրուցեց Առողջապահության նախկին փոխնախարար Ավետ Գրիգորյանի հետ:

«Նախ ուզում եմ ասել, որ նախաձեռնությանը կողմ եմ: Մինչդեռ, ինձ համար անընդունելի է, երբ խոսում են հայեցակարգի մասին՝ առանձնացնելով միայն 6 տոկոս հարկը, որովհետև այդ հայեցակարգը շատ ավելի ընդգրկուն է: Դեռ հստակ չէ՝ 6 տոկոս է, թե օրինակ՝ 4 կամ 8»,- ասաց նա:

Անդրադառնալով բազմիցս հնչող այն դժգոհություններին, թե աշխատողները վճարելու են չաշխատողների համար՝ Գրիգորյանը նկատեց, որ պետք է գործի համերաշխության սկզբունքը, որը ընդունված է ամբողջ աշխարհում և որի  արդյունքում՝ առողջը վճարում է հիվանդի համար, երիտասարդը՝ ծերի, աշխատողը՝ չաշխատողի:

«Չգիտեմ ինչու, բայց չաշխատող մարդուն բերում են որպես նախագծի բացասական կողմ: Կամ՝ հաճախ եմ լսում երբ ասում են, որ Հայաստանում կան չգրանցված, բայց եկամուտ ունեցող մարդիկ: Իրականում, դա այս հայեցակարգի հետ կապ չունի: Սա խնդիր է դատախազության, ոստիկանության, ՊԵԿ-ի համար, որպեսզի  քննեն այն մարդկանց, ովքեր եկամուտ ունեն, բայց եկամտահարկ չեն վճարում»,- ընդգծեց նա:

Գրիգորյանի խոսքով՝ մեր պետությունն այնքան հարուստ չէ, որպեսզի ամբողջությամբ հոգա իր քաղաքացիների առողջության և բուժման խնդիրները. «Այդ պատճառով էլ փնտրում են ուրիշ աղբյուրներ: Գումարը, որը հավաքվում է, ոչ միայն հիվանդին բուժելու համար է, այլև՝ մարդկանց առողջ պահելու համար»: 

Առողջության համապարփակ ապահովագրության նախագիծը նախատեսվում է իրականացնել 2022 թվականից:

Նրա խոսքով՝ մինչև ծրագիրը վերջնական հաստատվի, շատ բան կարող է փոխվել. «Մինչդեռ, դրական արդյունքը շատ շուտ կերևա: Բոլորս էլ գիտենք, որ հիմա բուժման նպատակով մարդիկ շատ հաճախ վաճառում են իրենց ունեցվածքը, բնակարանը: Իսկ այս նախագիծը կյանքի կոչելուց հետո՝ մարդիկ այլևս նման լուրջ խնդիրների առջև չեն կանգնի»:

Մեր այն դիտարմանը, որ այս նախագիծը հասարակության շրջանում բուռն քննադատության արժանացավ՝ Գրիգորյանը պատասխանեց. «Թող լինեն նաև քննադատություններ, քանի որ դա ևս բնական է: Բայց, այնուամենայնիվ, ուզում եմ նորից նշել, որ ես այն մարդկանցից եմ, ով պատրաստ է մինչև վերջ պայքարել այս նախագծի համար: Մենք պետք է առաջ գնանք, չենք կարող մնալ նույն տեղում: Ինձ համար սա որակյալ բուժօգնությանը միտված ծրագիր է»: