«168 ժամ». Սեփական պահպանության վարչությո՞ւն

«168 ժամ» թերթը գրում է. «Վերջերս սոցիալական ցանցերում լուրեր էին շրջանառվում, որ նոյեմբերի 28-ին լրանում է թվով 7000 օբյեկտների պահպանության վերաբերյալ  ոստիկանության հետ կնքված պայմանագրերի ժամկետը, որը չի երկարաձգվելու: Սա նշանակում է՝ բազմաթիվ ոստիկաններ կարող են ազատվել աշխատանքից եւ անաշխատանք մնալ։  Իսկ այս օբյեկտների պահպանությունը, ըստ սոցցանցերում շրջանառվող տեղեկությունների, վստահվելու է մասնավոր որոշ ընկերությունների, որոնց հետ կապվում էր նաեւ հայտնի գործարարներից մեկի անունը։

168.am-ը ՀՀ ոստիկանության հասարակայնության հետ կապի եւ լրատվության վարչությունից պարզաբանումներ էր խնդրել հետեւյալ հարցերի կապակցությամբ. «Որքանո՞վ է այս տեղեկությունը համապատասխանում իրականությանը: Եթե համապատասխանում է, ապա ի՞նչ հիմնավորումներով, որքա՞ն ընկերությունների հետ պայմանագրերի ժամկետներն են փոփոխվելու, եւ ո՞ր մասնավոր պահնորդական ընկերության մասին է խոսքը»: 

Մեր հարցադրումներին ի պատասխան՝ ուղարկած պաշտոնական գրության մեջ Ոստիկանությունը վստահեցրել էր, որ «համացանցում տարածված լուրերը իրականությանը չեն համապատասխանում»: Այնուհետ տեղեկացրել էր, որ պետական պահպանության գլխավոր վարչությունում կառուցվածքային փոփոխությունների հարց է քննարկվում: Այսինքն՝ ինչ-որ գործընթացներ են տեղի ունենում։

«Միաժամանակ տեղեկացնում ենք, որ, եթե ՀՀ ոստիկանության պետական պահպանության գլխավոր վարչությունում առանձին հաստիքների կրճատման հետեւանքով լինեն ազատված աշխատակիցներ, ապա վերջիններիս, առաջնահերթության կարգով, կառաջարկվի համալրել ՀՀ ոստիկանությունում առկա թափուր աշխատատեղերը: Այն անձինք, ովքեր չեն ցանկանա նշանակվել ՀՀ ոստիկանության համապատասխան պաշտոններում, մասնավոր պահնորդական ընկերություններում աշխատանքի ընդունվելու հնարավորություն նույնպես կունենան»,- ասված էր Ոստիկանության պատասխանի մեջ:

Եվ ահա, օրերս պարզ դարձավ, որ լուծարվում է Պետական պահպանության գլխավոր վարչության (ՊՊԳՎ) ռազմականացված ջոկատը, որի աշխատակիցները ոստիկաններ են: «168 Ժամի» աղբյուրի փոխանցմամբ՝ Պետական պահպանության գլխավոր վարչությունում հիմա մասշտաբային կրճատում է տեղի ունենում, եւ մինչեւ դեկտեմբերի 16-ը պետք է կրճատվեր մոտ 800 աշխատակից: «Հիմա, որպեսզի մարդկանց աշխատանքից չազատեն ՀՀ աշխատանքային օրենսգրքի 113-րդ հոդվածով, որն է՝ Աշխատանքային պայմանագրի լուծումը գործատուի նախաձեռնությամբ, մարդկանց պարտադրել են դիմումներ գրել եւ նշել, որ այլ աշխատանքի են անցնում: Ապօրինությունն այն է, որ վերոնշյալ հոդվածով արձակման նպաստ չեն տալու:

Բոլորի դիմումները գրված են, անձնական գործերը պատրաստ են, մնում է այդ օրը կնիքներն ընդամենը խփեն: Այնպես չէ, որ ծառայությունը վերացնելն ապօրինի է, հարցը մարդկանց ապօրինի կերպով աշխատանքից ազատելու մեջ է: Մի մեծ աշխատավարձ էլ չեն ստանում. մարդ կա՝ 60.000 դրամ, մարդ կա՝ 80.000 դրամ է ստանում: Արձակման նպաստն էլ դրան մոտ մի թիվ է լինելու, մեծ չէ: Այլ աշխատանք չի առաջարկվել, անգործ են մնալու»,- նշել է մեր աղբյուրը:

Հավելենք, որ ՊՊԳՎ ռազմականացված ջոկատը ֆինանսավորվում է արտաբյուջետային միջոցներով: Կառավարությունն իր 2018 թվականի նոյեմբերի 19-ի արտահերթ նիստում քննարկման էր դրել արտաբյուջեներից հրաժարվելու հարցը: ՀՀ Ոստիկանության 2015թ. տվյալներով՝ ՀՀ-ում պահնորդական գործունեություն են իրականացնում թվով 28 կազմակերպություններ, որոնցից մի քանիսը կոնկրետ գործարարների են պատկանում։ Այժմ իշխանությունները մտադիր են այդ կազմակերպություններից մեկ-երկուսին արտոնություններ տալ: Ավելին, մեր տեղեկություններով՝ նման ծառայություն բացելու մտադրություն ունի ՀՀ վարչապետ Նիկոլ Փաշինյանի թիկնազորի անդամ Ղազար Ղազարյանը (նա, ով հեղափոխության օրերին բռնում էր Փաշինյանի ուսապարկը)։ Մեր աղբյուրները նշում են, որ Ղ. Ղազարյանի եւ գործարարներից մեկին պատկանող կազմակերպություններ են տեղափոխվելու գործազուրկ դարձած ոստիկաների մի մասը։ Թվով 7000 օբյեկտների պահպանության պայմանագրերն այսուհետ կկնքվեն ոչ թե ոստիկանության, այլ այդ անձանց պահնորդական ծառայությունների հետ»:

Առավել մանրամասն՝ թերթի այսօրվա համարում