ՔԿՀ-ների շենքային պայմանները կբարելավվեն

Քրեակատարողական ծառայությունը հատկապես կարևում է քրեակատարողական հիմնարկների շենքային պայմանների բարելավման, տեխնիկական հագեցվածության ապահովման և ենթակառուցվածքների կատարելագործման ուղղությամբ արմատական բարեփոխումներ իրականացնելու անհրաժեշտությունը:

ԱՆ քրեակատարողական ծառայության կենտրոնական մարմնում դեկտեմբերի 20-ին տեղի ունեցած մամուլի ասուլիսի ժամանակ ծառայության պետ, արդարադատության գեներալ-մայոր Արթուր Գոյունյանը ասաց, որ այդ ուղղությամբ մշակվել են մի շարք ծրագրեր, որոնք նախատեսվում է ավարտել 2023 թվականին:

Յուրաքանչյուր տարի փուլ առ փուլ իրականացվելու են որոշակի աշխատանքներ, որի ընդհանուր գումարը կազմելու է 35.2 միլիարդ դրամ:

«Նուբարաշեն» և «Դատապարտյալների հիվանդանոց» ՔԿՀ-ները պետք է լուծարվեն: Երևան քաղաքում Սիլիկյան թաղամասում մոտ 10 հեկտար հողատարածքում կառուցվելու է միջազգային չափորոշիչներին համապատասխանող քրեակատարողական նոր հիմնարկ, որը ունենալու է նաև առանձին ստացիոնար հիվանդանոց:

Քրեակատարողական հիմնարկի կառուցման ուղղությամբ նախատեսվում է սկսել նախագծանախահաշվարկային աշխատանքները, որոնք կարժենան մոտ 417 միլիոն դրամ, շինարարության համար` մոտ 21.3 միլիարդ դրամ»,- ասաց Գոյունյանը:

Ըստ ՔԿԾ պետի` «Երևան-Կենտրոն» քրեակատարողական հիմնարկը նախատեսված է Ազգային անվտանգության վարչական շենքից տեղափոխել նախկին «Էրեբուն»-ի քրեակատարողական հիմնարկ, որպեսզի բոլոր տեսակի շահարկումները ԱԱԾ վարչական շենքի հետ կապված բացառվեն:  Այդ նպատակով նախատեսված է հատկացնել 3.7 միլիարդ դրամի չափով գումար :

«Հրազդան» քրեակատարողական հիմնարկը նույնպես նախատեսվում է լուծարել և փոխարենը մոտ 7 հա վրա տեղակայված ներկայիս «Սևան» քրեակատարողական հիմնարկի հարևանությամբ կառուցել նոր ժամանակակից պահանջներին համապատասխանող քրեակատարողական հիմնարկ`փակ և կիսափակ ռեժիմներով: «Գորիս» քրեակատարողական հիմնարկը նախատեսված է լուծարել: Արդեն իսկ ավարտվել են նախագծանախահաշվային աշխատանքները և Խնձորեսկում նախատեսված է կառուցել  նոր քրեակատարողական հիմնարկ:  

«Արմավիր» քրեակատարողական հիմնարկում նախատեսված է կառուցել տեղամաս, որում կապահովվեն կիսաբաց ռեժիմային պայմաններ:

Նախատեսված է, որ «Արմավիր» ՔԿՀ-ում կառուցվի ժամանակակից օդափոխության և ջեռուցման համակարգ, ինչը չէր կատարվել: Մոտ 10 միլիարդ դրամ գումար ծախսվել էր «Արմավիր» ՔԿՀ-ի կառուցման աշխատանքների վրա, բայց, ցավոք, ինչ-ինչ պատճառներով չի իրականացվել: Մեր առաջ նպատակ ենք դրել առաջիկայում լուծել այդ խնդիրը»,- եզրափակեց Գոյունյանը: