Գարիկ Սարգսյանը ներկայացրեց 2019 -ի հաշվետվությունը (տեսանյութ)

Արարատի մարզպետ Գարիկ Սարգսյանն այսօր ամփոփեց անցնող տարին: Լրատվամիջոցներին նա ներկայացրեց 2019 թ-ի հաշվետվությունը` մանրամասն ներկայացնելով 2019 թվականին մարզպետարանի կողմից կատարված աշխատանքները: Մարզպետը հատկապես կարևորեց քաղաքաշինության, կրթության, առողջապահության ոլորտում կատարված աշխատանքները։ Խոսեց նաև ներդրումային ծրագրերի մասին: Մարզպետի խոսքով՝ 2019 թվականի մայիսի 4-ին Արտաշատում տեղի ունեցած «Իմ քայլը հանուն Արարատի» բիզնես ֆորումը արդյունավետ է եղել և ապահովել է ներդրումներ: Ներկայացված ծրագրերից նա առանձնացրեց 3 ամենախոշորները:

Առաջինը Երևան -Երասխ միջպետական ճանապարահին 11 հա մեծության Մխչյան գյուղի տարածքում կառուցվող գյուղմթերքների շուկան է: Այս ծրագրի վերջնական հաշվարկով նախատեսվում է 4,5 միլիոն դոլլարի ներդրում, որն իրականացվելու է ՌԴ-ում բնակվող հայազգի ներդրողի կողմից։ Հաջորդ ծրագրով ներդրող գործարարի կողմից խաղողի այգիներ են տնկվում, և դրան կից կառուցվում է գինու և կոնյակի գործարան: Կառուցման աշխատանքներն իրականացնելիս այնտեղ ամեն օր միջին հաշվով 15 մարդ է աշխատում, իսկ գործարանի կառուցումից հետո մշտական աշխատողների թիվը կլինի 50-60 մարդ։ Երրորդ խոշոր ծրագրով մարզում սոյա կաճեցվի, ներդրողը մարզի տարբեր համայնքներում վարձակալել է 115 հա վարելահող: Այս պահին ընթանում են բարեկարգման աշխատանքներ: Մարզպետի խոսքով՝ գյուղացիական տնտեսություններին կտրամադրվի սերմանյութ և պարարտանյութ, կկառուցվի վերամշակման գործարան, ինչը կնպաստի աշխատատեղերի ստեղծմանը։

Մարզպետը դիմեց արտերկրում բնակվող մեր հայրենակիցներին և վստահեցրեց, որ ներդրումներ անելու դեպքում, նրանք անպայման կօգտվեն արտոնություններից․ «Մարզպետարանը մեր բոլոր հայրենակիցներին պատրաստակամ է օգնելու, աջակցելու, նաև նրանց ներակայացրած ծրագրերը կառավարության դատին հանձնելու և ինչ-ինչ արտոնություններից օգտվելու հնարավորություն տալու հարցում, միայն թե ցանկություն հայտնեն ներդրում անել ՀՀ-ում»: