Պապիկյանը կարևորում է Գյումրիում հաջողված փորձը մյուս քաղաքներում ևս կիրառելի դարձնելը

Կառավարությունը աշխատանք է տանում երկրի համաչափ զարգացումն ապահովելու նպատակով. Գյումրիում հաջողված փորձը կիրառելի կդարձնեն նաև հանրապետության մյուս քաղաքներում:

Այս մասին ասուլիսում ասաց ՀՀ տարածքային կառավարման և ենթակառուցվածքների նախարար Սուրեն Պապիկյանը:

«Երկրի համաչափ զարգացման ուղղությամբ մենք մեծ անելիք ունենք, և արդեն իսկ ունենք Գյումրիի նման շուրջ 10 տնտեսական այլ կենտրոններ, որոնք պետք է դառնան մեր երկրորդային քաղաքները: Այս ուղղությամբ աշխատանք ենք անում, և Գյումրիում հաջողված փորձը պետք է կիրառելի դարձնենք հանրապետության մնացյալ քաղաքների վրա, բոլոր այն քաղաքների վրա, որոնք ունեն տեսլական, ունեն զարգացման հնարավորություն»,-ասաց նախարարը:

Նա ուրախությամբ նկատեց, որ Գյումրիի նկատմամբ ուշադրությունը կարող է առաջացնել այլոց խանդը, և կարող է խոսք գնալ անհամաչափ զարգացման մասին: 2019-ին Գյումրիում հսկայական միջոցներ են ներդրվել: «Եվ պետք է ասեմ, որ 2020-ին այն առնվազն կրկնապատկվելու է: Գյումրին աղետի գոտի է, սակայն կան աղետի գոտում գտնվող այլ համայնքներ ևս, որոնք պակաս ուշադրության կարիք չեն զգում: Բայց Գյումրին մեզ համար նաև այն վայրն է, որտեղ 2019-ին կարողացանք ապահովել մթնոլորտի փոփոխություն: Եվ ես լիահույս եմ, որ 2020 թվականը Գյումրիի համար պետք է դառնա վերընձյուղման տարի, որովետև Գյումրին և գյումրեցիներն, իրոք, աղետի գոտում ապրողի կամ աղետի ենթարկվածի հոգեբանությունը հաղթահարելու կարիք ունեին»,-ասաց Պապիկյանը:

Նա նշեց՝  ներդրումները, որ 2019-ին կատարվել են և առաջիկա տարիներին պետք է կատարվեն, Գյումրիի համար նվազագույն են: Պապիկյանի կարծիքով՝ Գյումրին ավելիին է արժանի, և ավելիին են արժանի երկրորդային մյուս քաղաքները: