Էս իրողության հետ պիտի քնեմ, արթնանամ, որ առանց էմոցիաների որոշում կայացնեմ․ Թովմաս Գրիգորյան (տեսանյութ)

«Արդյունքների մասին գնահատական տալ այս պահին չեմ ուզում, որովհետև էմոցիոնալ վիճակում եմ»,- լրագրողների հետ զրույցում ասաց ՀՖՖ նախագահի պաշտոնում չընտրված Թոմաս Գրիգորյանը:

«Էս իրողության հետ պիտի քնեմ, արթնանամ, որ առանց էմոցիաների որոշում կայացնեմ բողոքարկման վերաբերյալ»,-ասաց Գրիգորյանը:

Գրիգորյանն իր ու Մելիքբեկյանի միջև տեղի ունեցած մրցապայքարը անհավասար համարեց․ «Իշխանական ու քաղաքական աջակցություն կար Մելիքբեկյանի նկատմամբ: Դահլիճում նստած էին բոլոր իր աջակիցները»:

Գրիգորյանի պնդմամբ՝ ՀՖՖ կասեցված 9 անդամներից 7-ը հօգուտ իրեն քվեարկողներն էին: «Կասեցումներից երկուսն ուղղակի խայտառակություն էին: Ապօրինի գործընթաց էր»:

Լրագրողների հարցին, թե արդյոք Ռուբեն Հայրապետյանի` իրեն սատարող հայտարարությունները ազդեցին ընտրության արդյունքի վրա, նա պատասխանեց. «Իհարկե, ինձ խանգարեցին նրա հայտարարությունները, մի քանի ՀԿ-ներ ինձ բացահայտ ասացին, որ չեն քվեարկելու իմ օգտին հենց այդ հայտարարությունների պատճառով: Իսկ իմ ու Ռուբեն Հայրապետյանի կապն ուղղակի կեղծ օրակարգ է, որ առաջ է քաշվել հատուկ նպատակով»:

Գրիգորյանը վստահեցրեց, որ այս ընտրությունը ոչ մի կերպ չի անդրադառնալու իր հետագա կարիերայի վրա, և ինքը հաստատ մնալու է ֆուտբոլում: Հիշեցնենք, որ 13 ձայնով ՀՖՖ նախագահ ընտրվեց Արմեն Մելիքբեկյանը, իսկ Թովմաս Գրիգորյանի օգտին քվեարկեցին 7 անդամ: 3 քվեաթերթիկ համարվեց անվավեր: