Գործը սկսել են առանց բուն խնդիրը հասկանալու. Խաժակյանը՝ ոստիկանություն հրավիրվելու մասին

Այն փաստաթղթերը, որոնք Երեւանի ավագանու «Լույս» խմբակցության ղեկավար Դավիթ Խաժակյանն ավագանու նիստին ցույց էր տվել եւ Գլխավոր դատախազություն հաղորդում տվել, Ոստիկանությունում իրենից չեն էլ պահանջել։ Ազատություն Հ/Ը «Ֆեյսբուքյան ասուլիս» հաղորդման ժամանակ զարմանքն է հայտնել   Դավիթ Խաժակյանը։

«Ինձ տեղեկացրին, որ գործը ուսումնասիրության փուլում է, հրավիրեցին ոստիկանության Երեւանի Կենտրոնի բաժանմունք։ Դա ինձ համար զարմանալի էր, քանի որ բարձրաստիճան պաշտոնյաներին վերաբերող գործերը չէի ակնկալում, որ այնտեղ կքննվեն։ Հուսով եմ՝ մյուս անգամ այլ ենթաբաժին չեն ուղարկի։ Այն ոստիկանները, որոնք պետք է քննեն այս գործը, առնվազն պետք է տիրապետեն Երեւանի մասին օրենքին, որ հասկանան՝ ի՞նչ է նշանակում  պաշտոնեական լիազորություններն անցնելը։ Ինձ համար տարակուսելի էր, որ այսքան ժամանակ անց ոստիկանությունը չէր ստացել հանցագործության մասին իմ հաղորդումը, որը ես ուղարկել էի Գլխավոր դատախազին։ Տեսնում եմ շահագրգռվածության որոշակի խնդիր, սակայն ես հետեւողական եմ լինելու»,- ասել է Խաժակյանը։

Նա նշել է, որ իրեն լրացուցիչ որեւէ հարց չեն տվել. «Գործը սկսել են, առանց բուն խնդիրը հասկանալու»։

Խաժակյանը հաղորդման ընթացքում ներկայացրել է, իր ձեւակերպմամբ, կեղծված փաստաթղթերը.

«Սրանք քաղաքապետի 2 կարգադրություններն են՝ նույն համարի, նույն ամսաթվի տակ եւ նույն թեմայի մասին։ Ենթադրում եմ, որ ստեղծվել է նոյեմբերի 4-ին կամ դրանից հետո, իսկ Մարությանի բացակայության ժամանակ՝ կարող եք տեսնել այդ թանաքային ստորագրությունը, եւ մյուսը, որն ինձ են պաշտոնապես տրամադրել , որի տակ արդեն Մարությանի գրիչային ստորագրություն է՝ կրկին ամսի 17-ով։ Եթե ուշադրություն դարձնեք թե ստորագրությունների տարբերությանը, թե ամսաթվերի ձեռագրային տեսքին, կհասկանաք, որ նույն թուղթը 2 անգամ կեղծվել է», ասել է ավագանու «Լույս» խմբակցության ղեկավարը։