Գիտության պետական կոմիտեի նախագահը և նրա տեղակալը աշխատանքից ազատվելու դիմում են գրել

ՀՀ Կրթության, գիտության, մշակույթի եւ սպորտի նախարարության գիտության պետական կոմիտեի նախագահ Սամվել Հարությունյանը եւ նրա տեղակալ Վարդան Սահակյանն աշխատանքից ազատվելու դիմում են գրել։

Մեզ հետ զրույցում Հարությունյանը նշեց, որ այդ որոշման միակ պատճառը տարիքն է, արդեն բավականին մեծ է. «Ամեն բան սկիզբ ու վերջ ունի, այժմ երիտասարդների ժամանակն է եկել, թող գան շարունակեն ինձ»:

Նա հավելեց, որ եթե ուրիշներն էլ իր օրինակին հետեւեն, վատ չեն անի, քանի որ կենսաթոշակի տարիքն անցնելուց հետո՝ տեղը պետք է զիջել երիտասարդներին: Հատկապես այս աշխատանքի դեպքում, երբ պահանջվում է ավելի մեծ շարժունակություն:

Նրա խոսքով՝ որոշումը վաղուց էր կայացրել, դեռ անցած տարի ԿԳՄՍ նախարար Արայիկ Հարությունյանին հայտնել է, որ թոշակի տարիքի է հասնում, հարկավոր է մտածել՝ երիտասարդի աշխատանքի ընդունելու մասին:

Ինչպես նշեց գիտության պետական կոմիտեի նախագահը, իր ազատման հարցում ո´չ ներքաղաքական իրավիճակ, ո´չ կոռումպցիոն սկանդալ չկա, ամեն ինչ կարգին է, ինքն էլ նախարարի հետ լավ հարաբերություններ ունի:

Վերջինս ավելացրեց, որ արտառոց բաներ փնտրելու կարիք չկա,  շուտով կլրանա 12 տարին, ինչ այդ աշխատանքն է անում: Երկար ժամանակ նույն պաշտոնում մնալն այնքան էլ լավ բան չէ. «Ես պրոֆեսիոնալ դասախոս եմ, կգնամ իմ գործը համալսարանում կշարունակեմ»:

Այն հարցին, թե որն է եղել նրա տեղակալ Վարդան Սահակյանի հրաժարականի պատճառը, պատասխանեց, որ պատճառը նույնն է՝ տեղակալն էլ գրեթե իր տարիքին է: Սամվել Հարությունյանը ծնվել է 1955 թվականին: 

Աղբյուրը՝ Armtimes.com