Ուսումնական հաստատություններում դասերը մեկ շաբաթով կդադարեցվեն. վարչապետ

Կորոնավիրուսի հետ կապված մեկ շաբաթ դասերը Հայաստանի ուսումնական հաստատություններում դադարեցնելու որոշում է կայացվել։ Այս մասին «Ֆեյսբուք»-ի իր էջի ուղի եթերում նշեց ՀՀ վարչապետ Նիկոլ Փաշինյանը։ «Մեզ պետք է որոշակի ժամանակ վերցնել, ավելի մանրամասն հասկանալ, ինչ է կատարվում»,-  ընդգծեց ՀՀ վարչապետը։

Փաշինյանը տեղեկացրեց, որ այդպիսով գարնանանյին արձակուրդները մեկ շաբաթ առաջ տեղի կունենան։

Նա վստահեցրեց, որ կորոնավիրուսի կանխարգելման հանձնաժողովն աշխատում է անընդհատ, և հորդորեց վստահել միայն պաշտոնական տեղեկատվությանը։ «Այս իրավիճակը մենք պատվով, ուժեղացած կհաղթահարենք»,- շեշտեց Նիկոլ Փաշինյանը։ Նա նաև ընդգծեց, որ կառավարությունը որևէ կենսականորեն անհրաժեշտ տեղեկատվություն չի թաքցնելու և շեշտեց. «Բացառված է, որ կառավարությունը որևէ այլ նպատակ ավելի կարևոր համարի, քան հանրային առողջության և անվտանգության խնդիրները»։

ՀՀ վարչապետը հավելեց, որ մտնելու է դեղատուն՝ բժշկական դիմակների հետ կապված իրավիճակին ծանոթանալու համար։

Անդրադառնալով Իրանի հետ հաղորդակցության խնդիրներին՝ վարչապետը նկատեց, որ Իրանի հետ սահմանը փակելու անհրաժեշտություն չկա, մանավանդ որ դա կարող է հանգեցնել «շուկայի վայրիվերումների», իսկ օդային հաղորդակցության դադարեցման դեպքում ավտոմեքենաներով Իրանից Հայաստան եկողները պետք է ավելի շատ մարդկանց հետ շփվեին քաղաքներում, քան օդանավով գալու դեպքում։

Նիկոլ Փաշինյանը պարզաբանեց, որ հերքվել է այն տեղեկատվությունը, թե այն անձը, որի մոտ մարտի 1-ի գիշերը կորոնավիրուսի է հայտնաբերվել, «Զվարթնոց» օդանավակայանից տուն է գնացել տաքսիով։ Վարչապետը հորդորեց ռիսկային գոտի չհամարել Ձաղկաձորը, որի «Գոլդեն Փելես» մինչ այժմ չգործող հյուրանոցում տեղավորված են այդ անձի հետ շփում ունեցած անձինք, և նկատեց, որ Ծաղկաձորում կյանքը պետք է բնականոն կերպով շարունակվի։