Խտրականություն է. վարչապետին ու տիկնոջը թեստավորել են, իսկ քաղաքացուն` ոչ

«Ընդհանուր թուլության, մարմնի կոտրատվելու, չոր հազի, դժվար շնչելու, կոկորդի ցավի, գլխացավի բողոքներով դիմել եմ պատկան կառույցների, որ իմանամ՝ ինչպես թեստ անցնեմ սոցիալական պատասխանատվության նկատառումներից ելնելով, սակայն ինձ ասացին չեմ կարող, քանի որ չեմ ջերմում, Իտալիայից չեմ եկել և ռիսկային խմբերում չեմ գտնվում: Չնայած դրան, վարչապետն ասում է՝ թեև ախտանիշներ չունեն ինքն ու կինը` թեստ են անցնելու: Ինչո՞ւ են խտրականություն դնում, ո՞ւմ համար են այդ թանկարժեք թեստերը: Բացի այդ, երբ կորոնավիրուսի առաջին դեպքը հայտնաբերվեց, վարչապետն ասում էր, որ տվյալ անձը չի ջերմում, սա ևս մարդկանց մոլորության մեջ է գցել, չենք հասկանում ջերմություն ունենալու դեպքում անհանգստանալ, թե՞` ոչ: Փաստացի բժիշկը թոքերումս խնդիր տեսավ՝ կոշտացումներ, բորբոքված կոկորդ, փառակալած լեզու ու մի երկու դեղ գրելով ուղարկեց տուն: Հիմա խուճապահար պատրաստվում եմ գնալ մասնավոր հիվանդանոց` ռենտգենի: Մարդուն թողել են իր հույսին ու սոցիալական պատասխանատվության մասին են խոսում: Բժիշկը չբացառեց, որ մոտս կարող է այդ թագավարակը լինել ու առանց ջերմության անցնել, հուսադրեց, թե ջահել եմ, ոտքի վրա էլ կարող եմ տանել, իսկ որ պոտենցիալ վարակակիր եմ, ոչինչ էլի»,- ԼՈՒՐԵՐ.com-ի հետ զրույցում իր վրդովմունքը հայտնեց լրագրող Թագուհի Ասլանյանը՝ անդրադառնալով Առողջապահության նախարարության կողմից կորոնավիրուսի կանխարգելման ոչ պատշաճ միջոցներին:

Ըստ նրա՝ մեղավորը ոչ թե պոլիկլինիկաների բուժաշխատողներն են, այլ նախարարությունը, որ չի իրազեկում՝ ինչ անել նման դեպքերում. «Արսեն Թորոսյանն ասուլիսի ժամանակ ասում էր, եթե տարածվի չենք կարող դիմակայել, որովհետև այդքան ներուժ չունենք, բայց ես տեսնում եմ, որ 15 վարակակիր ունենալու դեպքում էլ մենք պատրաստ չենք ու չենք էլ ուզում: Սիրտս պայթում է հենց սրանից, ոչ թե իմ առողջական վիճակից: Ո՞նց կարելի է սեփական քաղաքացու հանդեպ այսքան անտարբեր վերաբերմունք ունենալ: Ես անգամ չգիտեմ՝ իրենք տեղյա՞կ են ինչ վիճակ է պոլիկլինիկաներում, եթե տեղյակ չեն, ապա ինչո՞ւ չի վերահսկվում: Երեկ զանգահարեցի պոլիկլինիկա, ինձ ասացին մի արի, պարզվում է ժամը 4-5-ից արդեն հավես չունեն աշխատելու: Զանգեցի «Աստղիկ» ԲԿ, այստեղից էլ ասում են՝ 2 րոպեից զանգեք ու անջատում են: Ծանոթներիցս մեկն ասաց «Աստղիկ» չգնամ, որովհետև եթե ջերմություն ունեմ, դռան մոտից կճանապարհեն»,- ասաց Թագուհին նշելով, որ տևական ժամանակ է զանգահարում է շտապօգնություն, բայց ապարդյուն. զանգերին պատասխանող չկա:

Նրան զարմացրել է հատկապես Իտալիայից վերադարձած անձի նկատմամբ անտարբերությունը. «Պոլիկլինիկայում տեղեկացա, որ Իտալիայից 2 շաբաթ առաջ վերադարձած մեկին ասել են գա, ստուգվի: Բժիշկը վրդովվել է, թե ռիսկային խմբում լինելով ինչու դիմակ չի դրել, կամ տրանսպորտից է օգտվել, ասում է` թող շտապօգնություն կանչեր, տանեին ինֆեկցիոն, բժշկին ասում եմ՝ իմ օրինակով հասկանում եմ, որ իրեն որևէ մեկը չի ուղղորդել, թե ինչ անի»: 

Մեր զրուցակցի կարծիքով՝ վարակի տարածման առումով մեծ խնդիր է իրենից ներկայացնում նաև տրանսպորտը, իսկ քաղաքապետը ոչինչ չի ձեռնարկում:

Թագուհի Ասլանյանի խոսքով՝ Արսեն Թորոսյանը հույսն Աստծո վրա է դրել և հիշեց հետևյալ անեկդոտը՝ «Աստված նայում, տեսնում է բոլոր երկրներում պաշտպանվում են, իսկ Հայաստանում հումոր են անում, ասում է՝ սրանք էլի հույսներն ինձ վրա են դրել»: