«30 հարկանի հյուրանոցում 4-ով էինք ապրում, քաղաքը դարձել էր ուրվական». Մոնղոլիայում մնացած հային մի կերպ է հաջողվել վերադառնալ

Հասարակություն 14 Մարտ, 2020 18:46

«Կամ հայերս ենք չափից դուրս հանգիստ, կամ մոնղոլները՝ գերզգուշավոր։ Տնից առանց դիմակ դուրս գալն արգելվում է, 1 մետրից մոտ չեն շփվում միմյանց հետ։ Ամեն տեղ ձեռքերի հեղուկ է դրված, նույնիսկ հեռուստահաղորդավարները դիմակներով են, հեռուստացույցով մարդկանց սովորեցնում են՝ ինչպես դիմակ փոխել, աշխարհի հետ կապն ամբողջովին կտրված է ու սա միայն մի դեպք ունենալու դեպքում, հիմա ձգտում են բացառել տարածումը։ Սրան հակառակ՝ Հայաստանում կա տասնյակից ավելի հաստատված դեպք ու դեռ համբուրվելով են բարևում։ Մոտ 6 ամսից կիմանաք՝ ով էր ճիշտ, ով սխալ»,- այս մասին ԼՈՒՐԵՐ.com-ի հետ զրույցում ասաց «Globbing»-ի հիմնադիր Դավիթ Հարությունյանը, որն այս օրերին ստիպած էր մնալ Մոնղոլիայում։

Նա պատմեց, որ Մոնղոլիա է հասել մարտի 10-ի առավոտյան 7-ին և, ընդամենը, 2 ժամ անց՝ 9-ին, կորոնավիրուսով վարակման առաջին դեպքն է հայտնաբերվել: Նրա խոսքով՝ չնայած Մոնղոլիան Չինաստանի հետ սահմանակից է ու հիմնական շրջանառությունը դրա հետ է, մինչև այդ, զարմանալիորեն կորոնավիրուսի որևէ դեպք չէր հայտնաբերվել, քանի որ ամեն ուղևորի առանձին հատուկ ստուգում են, իսկ օդանավակայան թույլ են տալիս մտնել միայն անհրաժեշտության դեպքում։

«Կորոնավիրուսի այդ մեկ հաստատված դեպքից հետո փակեցին քաղաքի ելքերը և հայտարարեցին կարանտին, որպեսզի ում հետ շփվել էր տվյալ անձը կարողանան հայտնաբերել: Հետո առհասարակ փակեցին հաղորդակցությունը երկրի հետ. մարդկանց մուտքն ու ելքը արգելափակվեց՝ կապ չուներ ով որտեղի քաղաքացի է: Ավիահաղորդակցությունը, ճանապարհները, երկաթգիծը, մոլերը, բանկերը, մի խոսքով ամեն բան փակ էին բացի մթերային խանութներից ու դեղատներից։ Շենքեր, գրասենյակներ ու այլ հանրային տեղեր թույլ էին տալիս մտնել միայն դիմակով ու ձեռքերը սպիրտով մաքրելուց հետո։ 30 հարկանի հյուրանոցում 4-ով էինք ապրում, քաղաքը դարձել էր ուրվական, ես էլ մնացել էի Մոնղոլիայում: Միջավայրը շատ ճնշող էր, ոնց որ զոմբիների կինոներից լիներ»,- ասաց նա:

Մեր զրուցակիցը նշեց, որ դժվարությամբ, բայց արդեն հասել է Հայաստան. «Դեռ ընդամենը մեկ ավտոբուս են բաց թողել այն էլ ԱՄՆ-ի, Ֆրանսիայի, ՌԴ-ի, Ղազախստանի դեսպանատների աջակցությամբ, այնտեղի Արտգործնախարարի, Առողջապահության ու Արտակարգ իրավիճակների նախարարի թույլտվությամբ: Ճանապարհին մի քանի անգամ ստուգեցին բոլորիս նոր բաց թողեցին: Բախտներս բերեց, որ ռուսական ավտոբուսը սահմանը նոր էր հատել, դրա համար թողեցին մեզ էլ հետը անցնել սահմանը»,- նշեց Դավիթ Հարությունյանը: