էջմիածնեցի կնոջ մասին հումորային տեսանյութի հեղինակին ծեծելու դեպքով կասկածվող անձանց ինքնությունը պարզվել է

Իրավունք 18 Մարտ, 2020 22:24

Կորոնավիրուսով վարակված էջմիածինցի կնոջ մասին հումորային տեսանյութի հեղինակ Սերգեյ Սարգսյանին ծեծի ենթարկելու գործով 3 անձ ներկայացել է Ոստիկանություն և բացատրություն տվել։ Այս մասին ԼՈՒՐԵՐ.com-ին հայտնեցին Ոստիկանության լրատվական ծառայությունից:

Օրեր առաջ Սերգեյ Սարգսյանն իր ֆեյսբուքյան էջում գրել էր, որ Էջմիածնի նշանդրեքից հայտնի կորոնավիրուսով վարակված կնոջ հարազատները իրեն ծեծի են ենթարկել հումորային տեսանյութի համար: Նա նշել էր, որ 3 անհայտ անձինք իրեն ծեծի են ենթարկել Say Cheese սրճարանի մոտ:

Ոստիկանությունը ծեծի մասին հաղորդումը ստացել է մարտի 15-ին և հետաքննություն սկսել: «Ոստիկանները ճշտել են երեքի ինքնությունը, բացատրական աշխատանքների շնորհիվ նրանք ներկայացել են ոստիկանության բաժին և տվել են բացատրություն», - փոխանցեց Ոստիկանության լրատվության վարչության պետի տեղակալ Էդգար Ջանոյանը, սակայն այլ մանրամասներ չհայտնեց:

Հիշեցնենք, որ, Սերգեյ Սարգսյանը տեսանյութ էր հրապարակել, որտեղ մեքենայով քաղաքում շրջելիս նշում է, որ կորոնավիրուսը տարածած «ծյոծը» կարողացել է լուծել խցանումների հարցը և որքան հեշտ է դարձել երթևեկելը Երևանի փողոցներով հենց նրա շնորհիվ:

«Նենց կուզեի քո հետ ծանոթանայի, պաչպչվեի, օգտակար լինեի ձեր առիթին։ Այ սենց են հարց լուծում, ոնց որ ծյոծը լուծեց Երևանի տրանսպորտի հարցը, ոչ թե քաղաքապետարանի պես: Էջմիածնեցի մորքուր առողջություն քեզ, հաջորդ ագամ, որ տենց պլաններ ա լինում մոտդ երկիրը ոչ թե պարալիզացնես, այլ կարգավորես, շարժը պակասացնես, հիվանդներն էլ թող մեռնեն: Էջմիածնեցիք так держать, մորքուր բռնվի...»,-տեսանյութում ասում է Սերգեյ Սարգսյանը։