«Մեգա կրեդիտ» վարկային կազմակերպության գործողություններից տուժածները կարող են դիմել ՔԿ

ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում քննություն է տարվում՝ վարկային կազմակերպության տնօրենի և վարկային մասնագետի կողմից խարդախությամբ հափշտակություն կատարելու դեպքի բոլոր հանգամանքները, նրանց գործողություններից տուժած քաղաքացիների ամբողջական շրջանակը պարզելու ուղղությամբ:

2020թ. ապրիլին քաղաքացիներից հաղորդում է ստացվել այն մասին, որ վարկ ստանալու նպատակով դիմել են «Մեգա կրեդիտ» վարկային կազմակերպությանը, սակայն վարկային պայմանագրով իրենց տրամադրված գումարներից խաբեությամբ հափշտակվել են:

Դեպքի առթիվ հարուցվել է քրեական գործ՝ ՀՀ քրեական օրենսգրքի 178-րդ հոդվածի 1-ին մասով, որով նախաքննությունը կատարվում է ՀՀ քննչական կոմիտեի Երևան քաղաքի քննչական վարչության Աջափնյակ և Դավթաշեն վարչական շրջանների քննչական բաժնում:

Քննության տվյալներով՝ վարկային կազմակերպության տնօրենը և վարկային մասնագետը քաղաքացիների անվամբ լրացրել են վարկային առցանց հայտեր, սակայն մի դեպքում ստացված վարկի գումարի միայն կեսն են վճարել հաճախորդին, իսկ մեկ այլ դեպքում ընդհանրապես գումար չեն փոխանցել վարկառուին՝ այդկերպ խաբեությամբ առերևույթ հափշտակելով քաղաքացիների զգալի չափի գումարները:

Նկատի ունենալով, որ վարույթն իրականացնող մարմինը բավարար հիմքեր ունի ենթադրելու, որ «Մեգա կրեդիտ» վարկային կազմակերպության տնօրենի և վարկային մասնագետի գործողություններից կարող են տուժած լինել նաեւ բազմաթիվ այլ քաղաքացիներ, ուստի՝ նշված վարկային կազմակերպության աշխատակիցների գործողություններից տուժած անձանց  առաջարկվում է դիմել Աջափնյակ և Դավթաշեն վարչական շրջանների քննչական բաժին /ք. Երևան Շինարարներ 10/1, կամ զանգահարել 010-39-17-23 հեռախոսահամարով: