«Նիկոլ Փաշինյանի խամաճիկն է դատախազությունը, որը հնազանդ կերպով կատարում է Նիկոլ Փաշինյանի քմահաճույքները»

Ռոբերտ Քոչարյանի պաշտպանը՝ Հայկ Ալումյանը, լրագրողների հետ ճեպազրույցի ժամանակ ասաց. «Մենք դեռևս 2018 թվականից հայտարարում էինք, որ սա իր բնույթոց ոչ թե քրեական գործ է, այլ քրեական քողի տակ քաղաքական հետապնդում է: Մենք ընթացքում բազմաթիվ ապացույցներ կարողացանք վկայակոչել՝ սկսած հայտնի գաղտնալսումից, որը համացանցում հայտնվեց և շատուշատ ապացույցներով մենք կարողացանք ցույց տալ, որ սա քաղաքական հետապնդում է: Նիկոլ Փաշինյանի այս հերթական հայտարարությունը մեզ համար որևէ նորություն չէր, այդեղ ևս մեկ ապացույց էր՝ առկա է քաղաքական հետապնդում: Այսօր Նիկոլ Փաշինյանի խամաճիկն է դատախազությունը և այս գործով ուղղակի հնազանդ կերպով կատարում է Նիկոլ Փաշինյանի քմահաճույքները»,- նշեց Հայկ Ալումյանը:

Լրագրողների հետ զրույցում վերջինս անդրադարձավ նաև երեկ վարչապետի և դատարանների նախագահների և  ԲԴԽ անդամների հետ հանդիպմանը՝ նշելով, որ Նիկոլ Փաշինյանը ոչ թե հանդիպեց դատավորների հետ, այլ կանչեց նրանց իր մոտ. «Որոշ դատավորներ վարչապետի սուլոցով հայտնվեցին նրա կողքին, որը շատ ցավալի է: Եթե մենք հավակնում ենք քաղաքակիրթ աշխարհի մաս կազմել, ապա իշխանության գործադիր ճյուղը չպետք է կարողանա  սուլոցով դատավորներին կանչել իր նստավայր, իսկ դատավորներն էլ իրենց հերթին պետք է ունենան բավարար չափով արժանապատվություն, որ որևէ վարչապետ հանդգնի իրենց կանչի, իրենք չգնան»,- ընդգծեց Ռոբերտ Քոչարյանի պաշտպանը: