Ողջ երկրում 2018-ին եղել է 25 սառնարանային տեղ, այսօր միայն Երեւանում կա մոտ 200 տեղ. Փաշինյանը՝ դիահերձարանների մասին

Նախորդ օրերին մենք շատ ծանր տեսարանի ականատես դարձանք, երբ հրապարակվեցին Աբովյանի դատաբժշկական կենտրոնի հհայտնի կադրերը եւ ֆունդամենտալ հարցը, որ պետք է պատասխան ստանա հետեւյալն է՝ արդյոք սա պետության ու կառավարության վերաբերմունքն է արտահայտում զոհված զինվորների եւ ընդհանրապես հանգուցյալների նկատմամբ: Այս մասին, այսօր՝ հունիսի 3-ին, կառավարության նիստում հայտարարեց վարչապետի պաշտոնակատար Նիկոլ Փաշինյանը. «Այս հարցին պատասխանը գտնելու համար ես նախ կուզենամ առողջապահության նախարար Անահիտ Ավանեսյանը ներկայացնի, թե ոլորտում 2018-ից ի վեր ինչ փոփոխություններ են տեղի ունեցել և ինչ աշխատանքներ են արվել»,-ասաց նա:

Առողջապահության նախարարը պատասխանեց. «Մինչեւ 2018 թվականը ԱՆ ենթակայությամբ գործող «Դատաբժշկական գիտագործնական կենտրոնը» ունեցել է միայն Երեւանի դիահերձարանը բարոյապես մաշված կարողություններով: Մարզերում ընդհանրապես մասնաճյուղեր չեն եղել: Ծառայությունը կազմակերպվել է բժշկական կազմակերպությունների կողմից ժամանակավոր տրամադրվող  անհրաժեշտ չափանիշներին չհամապատասխանող սենյակներում: Դատաբժշկական ծառայությունն ունեցել է Երեւանում 25 սառնարանային տեղ, այժմ ունի մոտ 200 սառնարանային տեղ:

2018-ից հետո մշակվել եւ կյանքի է կոչվել դատաբժշկական համապետական, անհրաժեշտ չափանիշներին համապատասխան ծառայություններ ապահովող ցանցի ստեղծման ծրագիրը: Նախատեսվել է Երեւանում կենտրոնական կառույցի եւ մարզերում մասնաճյուղերի համապարփակ համակարգ եւ սկսվել են լայնածավալ աշխատանքներ: Այս ծրագրի շրջանակներում Մեծամոր, Աբովյան, Գյումրի, վանաձոր, Եղեգնաձոր, Սեւան, Գորիս քաղաքներում հիմնվել են մասնաճյուղեր:

2018-ին ամբողջությամբ վերանորոգվել է Երեւանի կենտրոնկան դիահերձարանը եւ սառնարանները համալրվել են նոր լաբորատոր սարքավորումներով: 2020 թվականին հիմնանորոգվել է  Մեծամորի դիահերձարանը եւ կառուցվել է սառնարանային նոր բլոկ: Հիմա ընթանում է երկրորդի կառուցումը: 2020-ին հիմնանորոգվել է Աբովյանի մասնաճյուղը, տեղադրվել են կասետային սառնարաններ, հիմա էլ լրացուցիչ սառնարանային նոր մաս է կառուցվում: 2020-ին Գորիսում տեղադրվել է նոր սառնարանային բլոկ: 2021-ին վերակառուցվում եւ սառնարաններով համալրվում է Մարտունու մասնաճյուղը: Այժմ նախագծվել եւ ընթանում է Սեւանի մասնաճյուղի ամբողջական վերակառուցման ծրագիրը: 2018-ից առաջ  գենետիկական հետազոտությունների անցկացման համար ընդահնարպես սարք չի եղել: 2018-ին  մի քանի գերատեսչությունների համատեղ ջանքերով գնվել է առաջին սեկվենատորը, իսկ 2020-ին երկրորդ ամբողջական հոսքագիծը»,- զեկուցեց Անահիտ Ավանեսյանը:

Վերջինս նաև տեղեկացրեց, որ 25 տոկոսով ավելացել է այդ ոլորտում աշխատողների աշխտավարձային ֆոնդը. «Ուժեղացվել է գիտագործմանակ բաղադրիչը: Ընդհանուր առմամբ, եթե խոսենք բյուջետային հատկացումների մասով, 2017-ին ընհանուր բյուջեն կազմել 389 մլն  դրամ: 2018-ի առաջին ամիսներին այն կրճատվել է 24 մլն դրամով: 2019-ին այդ բյուջեն դարձել է 481 մլն, 2020-ին՝ 594 մլն դրամ»,-ընդգծեց նախարարը:

Նիկոլ Փաշինյանն, անդրադառնալով կոնկրետ միջադեպին, երբ հրապարակվել էին Աբովյանի դիահերձարանում զինծառայողների տոկրակներով գետնին ընկած դիերը, ասաց. «Հիմա այդ միջադեպի հետ անմիջական առնչություն ունեցող բոլոր մարդիկ ազատվել են աշխատանքից: Բայց երբ որ համակարգերում բարեփոխումներ են տեղի ունենում, մենք տեսնում են ցույցեր, բողոքներ, որ այդ մարդկանց ազատում են աշխատանքից: Ես հիշում եմ, որ երբ մի ԲԿ-ում այդպիսի բարեփոխումների աշխատանք էր տեղի ունեցել, եւ երբ հեռուստատեսային ռեպորտաժը տեսա, ուղղակի շշմեցի: Այդ ԲԿ-ի աշխատողները չստիկներով դուրս էին եկել փողոց ցույց էին անում, հետո նույն չստիկներով մտան հիվանդանոց»,- ասաց վարչապետի պաշտոնակատարը: