Կոնֆետ էին շպրտում, զինվորները, ճանկռվելով, այդ կոնֆետների հետևից վազում էին. Նիկոլ Փաշինյան

Մեզ ասում են՝ ինչո՞ւ եք փող ծախսել զինվորի սննդի վրա. իսկ որ մարդիկ գալիս էին մտնում զորամասեր, կոնֆետ էին շպրտում, զինվորները, ճանկռվելով, այդ կոնֆետների հետևից վազում էին, դրանից պետք է ինքդ քեզ գնդակահարեիր: Այս մասին այսօր՝ հունիսի 7-ին, Էջմիածնում իր համակիրների հետ հանդիպման ժամանակ ասաց Նիկոլ Փաշինյանը՝ դիմելով նախկին իշխանություններին:

Ըստ նրա՝ պատերազմի մեջ գտնվող պետության բանակը եղել է բարեգործությունների առարկա, իսկ զինվորների համար անհրաժեշտ պարագաները  ծնողներն են ուղարկել. «Ձեռք բերված զենքի 75-80 տոկոսը մեր կառավարության օրոք է տեղի ունեցել. իսկ դուք ո՞նց էինք բանակը կառավարում:  Ձեր պատկերացումն այն էր, որ դուք պիտի հրամանատարներին բիզնեսներ տաք, զինվորների ծնողներին թալանեք, սկսած զինվորների արձակուրդայիններից զինվորներին չտաք: Զինվորները մի 2 հազար դրամ են ստանում, էդ էլ ձեռքներից առնեք: Մենք եկել ենք նույնիսկ այս չնչին գումարներն ենք կրկնապատկել: Եթե դուք մեր արածի տեմպի 1/3-ը  նախորդ 20 տարիներին պահեիք, մենք կունենայինք իսկապես անպարտելի բանակ: Դուք բանակի կենացը 20 տարի ոտքի վրա խմել եք, հետո պարզվել է, որ այն, ինչ դրված է այդ սեղանին, գողացել եք զինվորից:

Մեզ մեղադրում են՝ թե պետությունը քանդեցիք: Մենք ժառանգել ենք ստահոդ պետություն, որտեղ կա ֆուտլյար եւ չկա բովանդակություն, որովհետեւ բոլոր պետական ծառայողները առավոտյան գործի էին գնում ոչ թե մարդկանց ծառայելու, այլ գռփելու: Պետական ողջ համակարգը թաթախված է եղել կոռուպցիայի մեջ՝ բանակով սկսած, դատարաններով շարունակած. դուք դա գիտեք»,-ասաց Փաշինյանը: