Կրիշտիանու Ռոնալդուն մեկնաբանել է իր տեղափոխության վերաբերյալ լուրերը

Թուրինի «Յուվենտուսի» հարձակվող Կրիշտիանու Ռոնալդուն մեկնաբանել է իր ապագայի մասին լուրերը:

Ավելի վաղ ԶԼՄ-ները հայտնել էին, որ «Ոսկե գնդակի» հնգակի դափնեկիրը կարող է վերադառնալ «Ռեալ» կամ մեկնել անգլիական «Մանչեսթեր Սիթի»:
«Ինձ ճանաչողը հասկանում է, թե որքան կենտրոնացած եմ իմ աշխատանքի վրա: Ավելի քիչ խոսել, ավելի շատ գործելը իմ կարգախոսն է: Բայց հիմա ես պետք է հստակ դիրքորոշումս ներկայացնեմ: ԶԼՄ-ները անհարգալից վերաբերմունք են ցուցաբերում իմ և այս ասեկոսեներում ներգրավված բոլոր ակումբների նկատմամբ: «Ռեալում» իմ պատմությունն արդեն գրված է գոլերով և գավաթներով: Ես դեռ հարգում եմ այս ակումբը և հավատում եմ, որ «սերուցքայինների» երկրպագուները կշարունակեն ինձ ջերմությամբ հիշել »,- գրել է Ռոնալդուն Instagram-ի իր էջում:

«Ես չեմ կարող թույլ տալ, որ մարդիկ շարունակեն խաղալ իմ անվան հետ: Ես կենտրոնացած եմ իմ կարիերայի և աշխատանքի վրա, նվիրված եմ դրանց և պատրաստ եմ բոլոր մարտահրավերներին, որոնց ես պետք է դիմակայեմ: Մնացած ամեն ինչ պարզապես խոսակցություններ են»,-ավելացրել է 36-ամյա պորտուգալացին: 

Ռոնալդուն «Յուվենտուս» է տեղափոխվել «Ռեալից» 2018 թվականի ամռանը: Նախորդ մրցաշրջանում հարձակվողը բոլոր մրցաշարերում թուրինյան ակումբի կազմում անցկացրել է 44 հանդիպում, որոնցում դարձել է 36 գոլի հեղինակ: