Զինվորի մահվան մեղավորները կպատժվեն

Պաշտպանության նախարար Սեյրան Օհանյանը հոկտեմբերի 4-ին, արտակարգ նիստ է հրավիրել` նույն օրն Արմավիրի մարզի «Բաղրամյան» ուսումնական կենտրոնում ճամբարային հավաքների մեջ գտնվող ՀՀ ՊՆ N զորամասն պատկանող «Սատկո» մակնիշի ավտոմեքենայի վթարի կապակցությամբ:

Վթարի հետեւանքով ավտոմեքենայի թափքում գտնվող ժամկետային զինծառայողներից 6-ը տարբեր աստիճանի մարմնական վնասվածքներով տեղափոխվել են Արմավիր քաղաքի հիվանդանոց: Ժամկետային զինծառայող, ավագ, 21-ամյա Հայկ Արշակի Դավթյանը հիվանդանոցում մահացել է:

Կատարվածի առիթով ծառայողական քննություն է անցկացվում, եւ նախարարի՝ Բրյուսելից վերադառնալուց հետո նրան կզեկուցվեն քննության արդունքները, ինչից հետո Սեյրան Օհանյանը կկայացնի համապատասխան որոշումներ:

Արտակարգ նիստի մանրամասները չեն հրապարակվում,սակայն լուրեր են տարածվել,որ առաջիկա օրերին աշխատանքից ազատվելու են զորամասի գնդի հրամանատարը եւ տեղակալները, իսկ մի շարք զինվորականներ, այդ թվում` գեներալներ, ստանալու են խիստ նկատողություն:

Հիշեցնենք, որ վթարի առթիվ ՀՀ քր.օր.-ի 377 հոդվածի 2-րդ մասով (Մեքենաներ վարելու կամ շահագործելու կանոնները խախտելը)  ՀՀ ՊՆ քննչական ծառայության 4-րդ կայազորային քննչական բաժնում հարուցվել է քրեական գործ:Ձերբակալվել է ավագ լեյտենանտ Համլետ Հմայակի Վիրաբյանը: Քրեական գործի նախաքննությունը շարունակվում է: