Թալինում «իտալական կրքեր» են եռում. ի՞նչ չեն կիսել ՔՊ-ականները

 

Լրատվական կայքերից Yerevanlur-ին հասել են տեղեկություններ, որ այս ընթացքում Արագածոտնի նախկին մարզպետ Դավիթ Գևորգյանը, ում պաշտոնանկությունը կապում են հենց ի սկզբանե Սափեյանի թեկնածությունը չպաշտպանելու հետ, իրեն ենթարկվող անձանց միջոցով հիմնել է «Թալին աշխարհ» անունով դաշինք և հետաքրքրական է՝ արդյոք դրա նպատակը ընտրությունների ժամանակ աշխատելու է ՔՊ թեկնածուի դեմ։ Նույնիսկ, շատերի կարծիքով, համայնքապետարանի դիմաց կազմակերպված վերջին բողոքի ակցիաների հետևում հենց Գևորգյանն է, ով ամեն կերպ փորձում է տապալել թիմակցի աշխատանքը, իսկ հետագայում նաև՝ հաղթանակը ընտրություններում: Չի բացառվում, որ Գևորգյանը փորձի խանգարել Սափեյանին նաև գալիք ընտրություններում, դա է պատճառը, որ կրկին ակտիվացել են խոսակցություններն այն մասին, որ ՔՊ-ի և Սափեյանի համար Թալինում ձայն կբերի Արագածոտնի նախկին ՀՀԿ-ական մարզպետ Սարգիս Սահակյանը:

 

Գևորգյանի և Սափեյանի ջրերը վաղուց է, ինչ մեկ առվով չեն հոսում, Գևորգյանը դեռ մարզպետ եղած ժամանակ բացասաբար է վերաբերվել Սափեյանին համայնքի ղեկավարի պաշտոնում նշանակելու որոշմանը և չի էլ թաքցրել իր այդ տեսակետը:  168.am-ը գրել էր, որ ուղիղ 1 տարի առաջ Նիկոլ Փաշինյանին վարդի թերթերով դիմավորած Արագածավանում դժգոհություն է հասունանում։ Մարդիկ դեմ են համայնքների խոշորացմանը, ինչպես նաև խոշորացվող համայնքի ղեկավարի թեկնածու Տավրոս Սափեյանին։ Բացի այդ, Թալինի բնակիչները ուշագրավ հայտարարություններ էին արել` ասելով. «Մենք՝ Փաշինյանի աջակիցներս, ՔՊ-ի չե՛նք ընտրելու, դաշնակին, հանրապետականին կընտրենք, բայց ոչ Տավրոսին, նրանց թեկնածուները խելքը գլխին մարդիկ են․․․։ Եթե իշխանությունը կարծում է, որ առանց մեզ կկարողանա հաղթել, սխալվում է, վերահսկելու ենք ցանկացած ընտրատեղամաս, մի հատ թեթև խախտում, նույն պահին հրապարակելու ենք։ Դե բռնվե՛ք։ Մենք մեր վրդովմունքը Սուրեն Պապիկյանին էլ ենք հասցրել, Արագածոտնի մարզպետին էլ, այլ պաշտոնյաների էլ․․․»։ Անշուշտ, այս իրավիճակից կարող են օգտվել Սափեյանի դեմ աշխատող ուժերը:

 

Ինչպես երևում է` սեպտեմբերին Թալինում բավականին թեժ է լինելու, և մինչ քաղաքի բնակիչները սպասում են, թե երբ կլուծվեն նրանց խնդիրները՝ ՔՊ-ականները զբաղված են միմյանց ոտքի տակ փորելով: Իսկ կփորեն արդյունքում, թե ոչ՝ ցույց կտա ժամանակը: