Անկախության ու պետականության նպատակները համադրելի չեն նույնիսկ Հայաստանի կեսի հետ․ Պարույր Հայրիկյան

Ազգը ազգ է, երբ ունի անկախության ձգտում, երբ անկախ է․ սա ԱԻՄ առաջնորդ Պարույր Հայրիկյանի հաստատուն կարգախոսն ու կենսակերպն է։ Անդրադառնալով 1990 թ․ օգոստոսի 23-ին ՀՀ անկախության հռչակման պատմական դիպվածին և տոնական օրվան, անկախական շարժման անվանի գործիչն ու համահիմնադիրը նշեց․

«Հայերը մի բան պետք է հիշեն, որ իրենք հայ են, ազգ են՝ անկախության ու պետականության շնորհիվ։ Ռափայել Պատկանյանն էր ասում․ «հայը նա է, որ անկախության կըղձա՛»։ Սա է հայության հիմնական որակն ու ողնաշարը»։

Նա հիշեցրեց, որ ավելի քան 50 տարի առաջ գլխավորել է անկախական շարժումը, այդ ճանապարհին տեսել բազում զրկանքներ, քաղաքական հալածանքներ, բայց շարունակել է պայքարը՝ հանուն անկախության ու պետականության։

«Ժամանակին, Ղարաբաղ, միացում գոռացողները սահուն սպրդեցին դեպի ՀՀՇ, ապա անկախության ու պետականության շահը ստորադասեցին այլ նպատակների։ Անկախությունն ու պետականության նպատակները վեր են ամեն ինչից, դրանք համադրելի չեն նույնիսկ Հայաստանի կեսի հետ։ Մենք կորցրել ենք Հայաստանի 90 տոկոսը, բայց պատրաստ ենք պայքարել՝ մեզ համար բաղձալի նպատակ է եթե անկախությունն ու պետության կայացումը»,-շեշտեց Պարույր Հայրիկյանը։

Նրա բնորոշմամբ, իզուր չէ, որ ՄԱԿ-ը կոչվում է միացյալ ազգերի կազմակերպություն՝ պետության փոխարեն օգտագործելով ազգ եզրը, ասել է թե՝ կարևորել ազգային ինքնորոշման, ազգային գիտակցության և դրա բարձրագույն ձևի անկախության արժեքը։

Զրուցեց Արա Ալոյանը