Մահացու վրաերթ՝ Արարատի մարզում․ վարորդը կոտրել է նաև գազատար խողովակը, տան պարիսպը և դիմել փախուստի

Օգոստոսի 25-ին մահվան ելքով վրաերթ է տեղի ունեցել Արարատի մարզում։ Ժամը 00։40-ի սահմանում Mercedes մակնիշի ավտոմեքենան Ավշար գյուղի Խորենացի փողոցում դուրս է եկել հանդիպակաց երթևեկելի գոտի և նշված փողոցի 24 հասցեի դիմաց վրաերթի ենթարկել Ավշար գյուղի բնակիչը՝ 44-ամյա Ռուբիկ Անդրեասյանին, գրում է shamshyan.com-ը։

Ըստ աղբյուրի՝ վրաերթի ենթարկվածը, ով մի քանի մետր շպրտվել է ու հայտնվել հարևանի տան բակում, տեղում մահացել է։ Վարորդն էլ դեպքի վայրից դիմել է փախուստի։

Mercedes-ը, երբ դուրս է եկել հանդիպակաց երթևեկելի գոտի, բախվել է բազալտե սալիկին, առաջ ընթանալով՝ կոտրել գազատար խողովակի հենասյունն ու բնակչի տան քարե պարիսպը։

Ըստ աղբյուրի՝ Արարատի ոստիկանները, ճանապարհային ոստիկաններն ու քննիչներն օպերատիվ տեղեկություններ են ստացել, որ ավտոմեքենան վարել է Արարատի մարզի Ոսկու կորզման ֆաբրիկայի Բանավան թաղամասի բնակիչը՝ 22-ամյա Տ. Թ-ն։

Ձեռնարկվում են անհրաժեշտ միջոցառումներ վերջինիս հայտնաբերելու ուղղությամբ։ 

Դեպքի վայրում հավաքված գյուղացիներն ասեն են, որ նշված վայրում հաճախակի են ավտովթարներ լինում, և որ բնակիչները բազմիցս դիմել ենք պատկան մարմիններին, որպեսզի այդ հատվածում, որտեղ կա դպրոց, մանկապարտեզ, տեղադրվի կամ արագաչափ կամ արհեստական անհարթություններ։