Ղարաբաղը չե՛նք օկուպացրել. Ադրբեջանում նեղվել են Ուկրաինայի ԱԽ քարտուղարի արտահայտությունից

Օրերս ուկրաինական «1+1» հեռուստաալիքը կազմակերպել է հեռուստամարաթոն, որին մասնակցել է նաև Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը:

Խոսելով ուկրաինական պատերազմի և Կիևի նկատմամբ միջազգային գործընկերների, դաշնակիցների վերաբերմունքի մասին՝ պաշտոնյան հայտարարել է, որ ակնկալում է նրանց աջակցությունը: Նա հույս է հայտնել, որ այդ ամենին խոչընդոտ չի հանդիսանա ռուսական գազի  գործոնը կամ էներգետիկ հնարավոր ճգնաժամը:

Պաշտոնյան համոզմունք է հայտնել, որ Ուկրաինային չեն դավաճանի Մեծ Բրիտանիան, ԱՄՆ, փոխարենը նշելով, որ իր դաշնակիցների դեմ նման քայլի պատրաստ է գնալ Ռուսաստանը:

«Նրանք (ռուսները - խմբ.) կարող են այդպես վարվել. նրանք այդպես դավաճանեցին հայերին. Ադրբեջանը ներխուժեց այն տարածքները, որոնք համարում է իրենը»,-ընդգծել է Դանիլովը:

Նրա այս արտահայտությունը մեծ հիստերիա է բարձրացրել Ադրբեջանում, որտեղ տարբեր փորձագետներ ու քաղաքական գործիչներ հայտարարել են, թե Բաքուն չի օկուպացրել Ղարաբաղը, նշելով նաև ԱԳՆ մակարդակով բողոքի նոտա հղելու անհրաժեշտության մասին:

Բացի այդ, ադրբեջանական վերլուծաբանները պնդել են, թե Ռուսաստանը ոչ թե դավաճանել է հայերին, այլ օգնել Ղարաբաղյան 44-օրյա պատերազմի օրերին. հենց Մոսկվայի շնորհիվ է դադարել պատերազմը, որը Հայաստանի համար կարող էր ավելի կործանարար լինել՝ համոզված են Ադրբեջանում: