«Պատրա՞ստ ենք 2023 թվականի հարձակմանը». Էրդողանը պատրաստվո՞ւմ է նոր պատերազմի

Թուրքիայի նախագահ Ռեջեփ Թայիփ Էրդողանը, ելույթ ունենալով Երկրորդ հունա-թուրքական պատերազմում Թուրքիայի հաղթանակի 100-ամյակի կապակցությամբ, կրկին ուղերձ է հղել ծայրահեղ ազգայնական ամբոխին:

Ինչպես գրում է հունական City Times-ը, ևս մեկ անգամ հայտարարելով, որ Թուրքիան Սիրիայում ռազմական գործողության համար որևէ մեկի թույլտվության կարիքը չունի` նա անդրադարձել է Հունաստանին և դիմել ամբոխին. «Պատրա՞ստ ենք 2023 թվականի հարձակմանը»,- ասել է նա:

«Հույներն այն ժամանակվա մյուս թշնամի ուժերի խաղաքարերն էին, սակայն հավատով և վճռականությամբ թուրքերը կարողացան նրանց ծովը նետել»,- հավելել է Թուրքիայի նախագահը։

Իր ողջ ելույթի ընթացքում Էրդողանը ամեն կերպ փորձել է ատելության սերմանել հույների նկատմամբ.

«Թշնամին գուցե ավելի շատ գնդացիրներ, թնդանոթներ, բեռնատարներ, մեքենաներ ու ինքնաթիռներ ուներ, քան մենք, բայց մեր զինվորների հավատքով լցված սրտերը լրացրեցին այդ բոլոր թերությունները: Փաստորեն, մինչ հունական բանակը նահանջում էր, նրա 200.000 զինվորների 65%-ը ոչնչացվեց Աֆիոն-Քութահյա գծում։ Մենք տեսանք նահանջելիս թշնամու կողմից մեր բոլոր քաղաքների այրումն ու ավերումը, որպես ապացույց նրանց ստոր էության, ինչպես այսօր»,- ասել է Էրդողանը։

Էրդողանի կառավարության գործընկեր Դեւլեթ Բահչելին նույնպես չափազանց սադրիչ էր օգոստոսի 30-ի «Հաղթանակի օրը» իր ելույթում։

Բահչելին հորդորել է Հունաստանի կառավարությանը «խելքի գալ» կամ «այն գինը, որը կվճարեն հույները, շատ ավելի ծանր կլինի, քան 1922 թվականի օգոստոսի 30-ինը»։

«Հունաստանը փորձում է մեր ազգի համբերությունը Միջերկրական ու Էգեյան ծովում և մեծացնում է իր ճնշումը օդում և ցամաքում: Իրականում սա ասիմետրիկ արտացոլումն է այն ցավի ու մղձավանջի, որը նրանք ապրում են արդեն հարյուր տարի»,- ասել է նա։

Բացի այդ, Բահչելին Հունաստանին մեղադրել է Միջերկրական ծովում առաքելություն իրականացնող թուրքական ինքնաթիռներին Կրետեում տեղակայված S-300 համակարգերով ահաբեկելու մեջ։

Բահչելին փորձել է նաև կրոնական ենթատեքստ տալ Հունաստանի դեմ ներկայացված պահանջներին։

«Թուրքերի և իսլամի հանդեպ թշնամանքը կուրացրել է Աթենքի կառավարությանը, որն անտեսում է և՛ մարդկային խիղճը, և՛ միջազգային իրավունքը՝ աջակցելով ահաբեկչական կազմակերպություններին», - ասել է Էրդողանի կառավարության գործընկերը։

Իսկ իր սադրիչ ուղերձը նա ավարտել է «Կապույտ հայրենիքին» անդրադառնալով. «Կապույտ հայրենիքը թուրք ազգի գողացված ու բնակեցված տարածքն է։ Այս աշխարհում ոչ ոք չի աջակցի հանցագործին: Իհարկե, ճշմարտությունն իր տեղը կգտնի վերջում։ Դա պարզապես ժամանակի հարց է: Մենք գիտենք և հավատում ենք, որ հուսահատությունը գալիս է սատանայից, իսկ հույսը՝ Ալլահից»,- նշել է նա: