Առաջիկա օրերին մեր վճռականության, անկոտրում պայքարի շնորհիվ կկարողանանք լրացուցիչ հաջողություններ արձանագրել. Արտակ Բեգլարյան

Արցախի Հանրապետության նախկին պետնախարար, Արցախի նախկին ՄԻՊ Արտակ Բեգլարյանը, ով այսօր Երևանում ՄԱԿ-ի հայաստանյան գրասենյակի դիմաց անժամկետ նստացույց է սկսել, տեսանյութ է հրապարակել՝  ներկայացելով նստացույցի առաջին օրվա արդյունքներն ու առաջիկա անելիքները։

«Գրասենյակի բոլոր մուտքերն արգելափակված են, նստացույցին մասնակցում են տասնյակ քաղաքացիներ, օրվա ընացքում հարյուրավոր քաղաքացիներ, տարբեր հանրային գործիչներ եկել են, աջակցություն են հայտնել, պատրաստակամություն են հայտնել տարբեր ձևերով պայքարել Արցախի ներկա իրավիճակի կարգավորման, խնդիրների բարձրաձայնման ուղղությամբ։

Վաղը նախատեսում ենք որոշակի հանդիպումներ։ Կարծում ենք՝ ՄԱԿ-ի գրասենյակից արդեն որոշակի պաշտոնական արձագանքներ կտան մեր ակցիաներին ու մեր պահանջներին»,- ասաց Բեգլարյանը։

Նա նաև հայտնեց, որ դեկտեմբերի 15-ին տեղահանված տարբեր խմբերի կողմից ժամը 11։00-ին լրացուցիչ ակցիա է նախատեսվում այստեղ։

«Սփյուռքի մեր հայրենակիցներին կոչ եմ անում բոլորն իրենց քաղաքներում, երկրների կառավարություններին ճնշման տակ պահեն բողոքի ակցիաներով, ստորագրահավաքներով, այլ գործիքակազմերով, որպեսզի հնարավորինս հստակ, հասեցական դատապարտեն Ադրբեջանի հանցագործ, ցեղասպանական գործողությունները և կոնկրետ գործնական քայլերով կանխեն հետագա նմանատիպ  ահաբեկչություններն ու ցեղասպանական գործողությունները։

Իսկ մեր հայրենակիցներին Արցախում ամրություն ենք մաղթում, խնդրում ենք, հորդորում ենք դիմանալ, քանի որ, կարծում եմ, որ առաջիկա օրերին, մեր, ձեր վճռականության, ամրության, անզիջում, անկոտրում պայքարի շնորհիվ մենք կկարողանանք լրացուցիչ հաջողություններ արձանագրել։

Իսկ հայաստանյան հասարակությունից ակնկալում եմ, հորդորում եմ, որ ոչ մեկ անտարբեր չանցնի, ոչ մեկ չմտածի, թե մենք անօգնական ենք։ Մենք կարող ենք լուծումներ գտնել, եթե  համախմբված լինենք, միայն թե յուրաքանչյուրիցս կախված գործողությունների մենք դիմենք և դա չլինի միայն հայտարարություն, տեղեկատավական աշխատանք, այլ նաև գործնական աշխատանք, այդ թվում բողոքի ակցիաների տեսքով»,- ասաց Արտակ Բեգլարյանը