Մեկնարկել է Մանկապատանեկան ֆիլմերի 8-րդ միջազգային փառատոնը

ՀՀ նախագահի և ՀՀ մշակույթի նախարարության աջակցությամբ, Հայաստանի «Ռոլան Բիկով» հիմնադրամը ս. թ. հոկտեմբերի 20-24-ը Երևանում և 30 օր ՀՀ մարզերում անցկացնում է Մանկապատանեկան ֆիլմերի 8-րդ միջազգային փառատոնը: Այս տարի փառատոնին ներկայացվել է 27 երկրի՝ 105 ֆիլմ: Մանկապատանեկան ֆիլմերի 8-րդ միջազգային փառատոնի շրջանակներում նախատեսվում են փառատոնի բացման և փակման արարողություններ, կինոդիտումներ, ֆիլմերի անդրանիկ ցուցադրություններ, քննարկումներ, վարպետության դասեր, ստեղծագործական հանդիպումներ հանրակրթական, արվեստի դպրոցներում, բուհերում, կլոր սեղաններ, ցուցահանդեսներ, ինչպես նաև մշակութային, կրթական, սոցիալական ծրագրեր, այդ թվում.

*2010 թ. մեկնարկած «Դու մենակ չես... Միասին կհաղթենք...» ծրագիրը, որը փառատոնի և Մոսկվայի մանկական հեմատոլոգիայի, ուռուցքաբանության և իմունոլոգիայի գիտական կենտրոնի համագործակցության արդյունք է: Այս տարի այն կանցկացվի 3-րդ անգամ, ինչի շրջանակներում Երևան կժամանեն բժշկական գիտությունների դոկտոր, պրոֆեսոր Ալեքսանդր Կարաչունսկին և Ալեքսեյ Մասչանը: Վերջիններս, պրոֆեսոր Ռ. Յոլյանի անվան արյունաբանական կենտրոնում կանցկացնեն բժշկական խորհրդատվություն և դասախոսություններ:
*«Ես իրավունքներ ունեմ» նախագծի շրջանակում՝ ՅՈՒՆԻՍԵՖ-ի հայաստանյան գրասենյակի հետ կիրականացվի «Ես ձեզանից մեկն եմ» խորագրով ծրագիրն, որը կբարձրաձայնի սահմանափակ կարողություններով, հասարակությունից մեկուսացած երեխաների իրավունքների մասին: Նույն խորագրի ներքո կկազմակերպվի նաև նկարչական աշխատանքների ցուցահանդես:
*Հայազգի պրոդյուսերներ Արմինե Անդայի և Հասմիկ Հովհաննիսյանի նախաձեռնությամբ կիրականացվի «Կինոսարդ» խորագրով կինոֆորումը, որի շրջանակում կանցկացվի «Մանու Պիլոտ 2012» ծրագիրը, որը ներառում է քննարկումներ՝ Շվեդիայի մանկական ֆիլմերի ֆորումի և «Kids Cluster» ծրագրի նախագահ Աննետ Բրեյների հետ: Կկազմակերպվի մանկական ֆիլմերի համատեղ արտադրությանը միտված փորձի փոխանակում, տարբեր երկրների երեխաների համատեղ ստեղծագործական մրցույթ:Մանկապատանեկան ֆիլմերի 8-րդ միջազգային փառատոնի «Խաղարկային ֆիլմեր» անվանակարգի պրոֆեսիոնալ ժյուրին նախագահում է «Սլավա» կինոընկերության գեղարվեստական ղեկավար, Ռուսաստանի և Տաջիկստանի կինեմատոգրաֆիստների միությունների անդամ Վալերի Ախադովը /Ռուսաստան/: Ժյուրիի կազմում ընդգրկվել են ՀՀ վաստակավոր արտիստ, դերասանուհի, միջազգային մրցույթների դափնեկիր, պրոֆեսոր Լալա Մնացականյանը /Հայաստան/ և Վրաստանի Երիտասարդության պալատի «Պիոներֆիլմ» ստուդիայի ղեկավար Գրիգոլ Չիգոգիձեն /Վրաստան/:

«Լիամետրաժ և կարճամետրաժ անիմացիոն ֆիլմեր» անվանակարգերի պրոֆեսիոնալ ժյուրին նախագահում է միջազգային փառատոների մրցանակակիր, պրոդյուսեր, սցենարիստ, ռեժիսոր Ալեքսեյ Ալեքսեևը /Ռուսաստան/: Ժյուրիի կազմում ընդգրկվել են Վրաստանի կինեմատոգրաֆիստների միության անդամ, Վրաստանի նախագահի պատվավոր շքանշանակիր, ռեժիսոր Թեյմուրազ Սիխարուլիձեն /Վրաստան/ և Ռուսաստանի անիմացիոն ֆիլմերի ասոցիացիայի անդամ, «Toonbox» ստուդիայի գլխավոր պրոդյուսեր Պավել Մունտյանը /Ռուսաստան/:

«Ես իրավունքներ ունեմ» անվանակարգի պրոֆեսիոնալ ժյուրին նախագահում է Վրաստանում Հելսինկյան քաղաքացիական ասամբլեայի համակարգող, Տարածաշրջանային անվտանգության հարավկովկասյան ինստիտուտի գործադիր տնօրեն Ալեքսանդր Ռուսեցկին: ժյուրիի կազմում ընդգրկվել են ռուսաստանյան և միջազգային կինոփառատոների մրցանակակիր, ռեժիսոր Պավել Բարդինը /Ռուսաստան/ և «Farabi Cinema Foundation»-ի միջազգային հարաբերությունների բաժնի ղեկավար, «CIFEJ»-ի, «Asia-Pacific» կինոփառատոնի տնօրենների խորհրդի անդամ Ամիր Էսֆանդիարին /Իրան/:

Այս տարի մանկապատանեկան ժյուրիի կազմում հայ երեխաների հետ ընդգրկվել են պատանիներ Ռուսաստանից, Ուկրաինայից, Բելառուսից, Վրաստանից, Չինաստանից, ինչպես նաև՝ սիրիահայ երեխաներ: