Գյուղատնտեսական կոոպերատիվները աշխարհը սնելու բանալին են

Այս տարի Պարենի համաշխարհային օրվա թեման է ՝ «Գյուղատնտեսական կոոպերատիվները աշխարհը սնելու բանալին են»: Թեմայի ընտրությունը նպատակ է հետապնդում կարևորել այն բազմաթիվ կոնկրետ ուղիները, որոնց կիրառմամբ գյուղատնտեսական կոոպերատիվները և արտադրողների միությունները նպաստում են պարենային անվտանգության ապահովմանը, աշխատատեղերի ստեղծմանը և մարդկանց դուրս բերում աղքատության ճիրաններից: Պարենի և գյուղատնտեսության կազմակերպության և իր գործընկերների համար գյուղատնտեսական կոոպերատիվները հանդիսանում են դաշնակիցներ' սովի և ծայրահեղ աղքատության դեմ պայքարում: Այս կառույցների կարևորությունը հաստատել է նաև Միավորված ազգերի կազմակերպությունը' 2012 թվականը հռչակելով Կոոպերատիվների միջազգային տարի:

Վերջին երեք տասնամյակների ընթացքում կրճատվել են գյուղատնտեսության բնագավառում պետական ներդրումների և զարգացմանն ուղղված պաշտոնական աջակցության ծավալները, ինչի հետևանքով միլիոնավոր փոքր արտադրողներ պայքար են մղել' կլիմայի, շուկաների և գների փոփոխականությանն ու ճգնաժամերին հակազդելու և դրանք հաղթահարելու համար: 2007-2008 թվականներին սկիզբ առած պարենային ճգնաժամից ի վեր՝ բազմաթիվ երկրներ վերահաստատել են աշխարհում սովի հաղթահարման և կենսապահովման միջոցների բարելավման իրենց հանձնառությունները: Սակայն որոշ դեպքերում կոնկրետ քաղաքական, ծրագրային և ֆինանսական աջակցությունը ետ է մնում ստանձնած բանավոր հանձնառություններից:

Այն հնարավորությունը, որը կարող էր ստեղծվել 2007-2008 թվականներին պարենի գների թռիչքի արդյունքում՝ որպես փոքր արտադրողներին աղքատությունից դուրս հանելու ճանապարհ, չիրագործվեց:
Ամեն օր փոքր արտադրողներն աշխարհով մեկ շարունակում են բախվել այնպիսի խոչընդոտների, որոնց պատճառով, լինելով շուկաների ակտիվ մասնակիցներ, չեն կարողանւմ քաղել իրենց աշխատանքի լիրաժեք օգուտները և նպաստել պարենային անվտանգության ապահովմանը ոչ միայն իրենց, այլ նաև բոլորի համար: Այդուհանդերձ, թույլ ենթակառուցվածքներն ու ծառայությունների, տեղեկատվության, արտադրական ակտիվների և շուկաների սահմանափակ հասանելիությունը, ինչպես նաև թույլ ներկայացվածությունը որոշումների կայացման գործընթացներում ցույց են տալիս, որ այս ներուժը չի իրացվել:
Փաստերը ցույց են տալիս, որ կայացած կոոպերատիվներն ու արտադրողների միությունները ունակ են հաղթահարելու վերոնշյալ խոչընդոտներն ու մեղմելու պարենային և այլ ճգնաժամերի բացասական ազդեցությունը: Արտադրողների հզոր միությունները օգնել են լրացնելու այդ բացը: Նրանք կարողացել են հաղթահարել շուկայական և որդեգրված քաղաքականության խոչընդոտները' իրենց անդամներին տրամադրելով մի շարք ծառայություններից և միջոցներից օգտվելու հնարավորություն: Օրինակ, նրանք կարող են կրճատել ֆերմերների ծախսերը' հնարավորություն տալով գնումներ կատարել խմբերով և օգտվել գյուղատնտեսական արտադրության միջոցների ձեռքբերման առավել բարենպաստ մանրածախ գներից: Նրանք նաև իրենց անդամներին հնարավորություն են տալիս բարձրաձայնել իրենց մտահոգություններն ու շահերը և իրենց դերակատարումն ունեն որոշումների կայացման և քաղաքականությունների մշակման գործընթացներում:

Մենք ունենք կայացած և միավորող կազմակերպությունների օրինակներ, որոնք խթանում են կոլեկտիվ գործունեությունը' իրենց ապրուստը գյուղատնտեսությամբ, ձկնորսությամբ, անասնապահությամբ և հարակից այլ աշխատանքներով վաստակող մարդկանց շրջանում: Այս կազմակերպությունները գործում են համայնքային, ազգային և միջազգային մակարդակում' աշխատելով համակցել իրենց անդամների տնտեսական և սոցիալական նպատակները: Բազմիցս նշվել է, որ մենք ունենք սովն ու թերսնումը վերացնելու միջոցները: Մեզ անհրաժեշտ է ստեղծել այնպիսի նպաստավոր միջավայր, որը թույլ կտա փոքր արտադրողներին լիարժեք օգուտ քաղել առկա հնարավորություններից: Այդ նպաստավոր միջավայրի անհրաժեշտ բաղադրիչը կայացած կոոպերատիվներն ու արտադրողների միություններն են:
ՄԱԿ-ի Պարենի և գյուղատնտեսության կազմակերպությունն աջակցում է իր անդամ կառավարություններին' կոոպերատիվներին և արտադրող միություններին օգնելու գործում' մշակելով անհրաժեշտ քաղաքականություններ, իրավական դաշտ, տնտեսական խթաններ և ձևավորելով քաղաքականության մշակման վերաբերյալ երկխոսության ֆորումներ: Բացի այդ, ՄԱԿ-ի Պարենի և գյուղատնտեսության կազմակերպությունը ներկայացնում է փաստեր, գիտելիք և հաջող փորձ, որն աջակցում է առավել ինքնավստահ, միավորող, գենդերային հավասարություն ապահովող և շուկայամետ կոոպերատիվների և արտադրողների միությունների ի հայտ գալուն:
Պարենի և գյուղատնտեսության կազմակերպությունը, ՄԱԿ-ի և այլ գործընկերների, այդ թվում' Կոոպերատիվների խթանման և առաջխաղացման կոմիտեի (COPAC) և Հռոմում գտնվող գործակալությունների հետ միասին, շարունակելու է հզորացնել և աջակցել կոոպերատիվներին որպես առանցքային շահառուների' ի նպաստ նոր հնարավորությունների բացահայտման և պարենային առումով առավել անվտանգ ու կայուն աշխարհ ունենալու ընդհանուր նպատակի: