Վրաստանում տեղի է ունենում նորընտիր խորհրդարանի նիստը

Վրաստանի նորակազմ խորհրդարանի առաջին գումարման նիստը տեղի է ունենում այսօր Արևմտյան Վրաստանի Քութաիսի քաղաքում, հաղորդում է Новости Грузия-ն:

Առաջին նիստի ժամանակ ընտրվելու է խորհրդարանի նախագահը, որի պաշտոնը ստանձնելու համար «Վրացական երազանք»-ը առաջ է քաշել Դավիդ Ուսուպաշվիլիի թեկնածությունը, ընտրվելու են նաև փոխխոսնակները, հանձնաժողովների անդամները, կձևավորվեն խմբակցությունները:

Սրան հաջորդելու է նախարարների խորհրդի ձևավորման գործընթացը, որը ներկայացվելու է խորհրդրանի հաստատմանը: Նախարարների խորհրդի կազմի հաստատումը նախատեսված է հոկտեմբերի 23-24-ին:

Նոր խորհրդարանը գործելու է Վրաստանի մեծությամբ երկրորդ քաղաք Քութաիսիում: Կառավարությունը պետք է Թբիլիսիից տեղափոխվի Քութաիսի:

Նոր իշխանությունները հայտարարել են, որ չեն ցանկանում նիստերը գումարել Քութաիսիում, քանի որ խորհրդարանի համար նախատեսված ապակեպատ սրահում դեռ շարունակվում են շինարարական աշխատանքները, և բացի այդ պայմաններ չկան պատգամավորների ժամանակավոր բնակության համար: