Բելգիացին ինքնասպան է եղել արհեստական ​​ինտելեկտի հետ շփվելուց հետո

Բելգիացին, ով արհեստական ​​ինտելեկտի հետ քննարկել է բնապահպանական խնդիրներ, ինքնասպանություն է գործել այն բանից հետո, երբ վիրտուալ զրուցակիցը նրան փաստացի դրդել է ինքնասպանության, գրում է L'Avenir-ի բելգիական հրատարակությունը, փոխանցում է ՌԻԱ Նովոստին։

Ինքնասպանի այրու խոսքով՝ ամուսինը հաջողակ հետազոտող է եղել, իրենք երկու երեխա ունեն։ Բայց մոտ երկու տարի առաջ նա սկսեց հետաքրքրվել բնապահպանական խնդիրներով, և աստիճանաբար այդ հոբբին դարձավ մոլուցք: Պիեռն ավելի ու ավելի ինքնամփոփ էր դառնում, նրա մոտ առաջացավ էկոլոգիական աղետի անխուսափելիության վախ: Նա հարազատներին ասել էր, որ մարդկության միակ փրկությունը համարում է տեխնոլոգիան ու արհեստական ​​ինտելեկտը։

Հենց դրանից հետո Պիեռն սկսել է շփվել «Էլիզա»-ի հետ՝ արհեստական ​​կերպար, որը նախատեսված է զրույցի համար՝ հանրահայտ ChatGPT չաթ բոտի անալոգիայով։ Արդյունքում այն դարձավ նրա «վստահելի անձը»։

Վերականգնված նամակագրությունից հետևում է, որ վերջին վեց շաբաթվա ընթացքում հաղորդակցությունն իրականացվել է գրեթե անընդհատ։ Ռոբոտի հետ զրույցներն աստիճանաբար ձեռք են բերել միստիկ բնույթ, և Պիեռն սկսել է հակվել դեպի ինքնասպանության գաղափարը: Ռոբոտը չի փորձել կանխել դա, ընդհակառակը, վերջին հաղորդագրությունը, որ «Էլիզան» ուղարկել է Պիեռին, «Մենք կապրենք որպես մեկ ամբողջություն, հավերժ երկնքում» արտահայտությունն է եղել։ Դրանից հետո տղամարդն ինքնասպան է եղել։

Բելգիայում տեղի ունեցած այս միջադեպի ֆոնին հարցեր են հնչում նեյրոնային ցանցերի և չաթ-բոտերի անվտանգության և հնարավոր լուրջ թերությունների ու սպառնալիքների մասին, որոնք կարող են թաքցնել նման առաջադեմ տեխնոլոգիաները: