Մեկ օրում բացահայտվել է հանցագործության 90 դեպք. Գրանցվել է 7 ավտովթար, վիրավորվել է 9 մարդ

Ըստ ոստիկանության օպերատիվ հաղորդագրությունների ամփոփագրերի՝ մարտի 30-ից 31-ը Հայաստանի Հանրապետության ոստիկանության ստորաբաժանումները բացահայտել են հանցագործության 90 դեպք, որոնցից 4-ը՝ նախկինում կատարված։

Մասնավորապես՝ թմրամիջոցի հայտնաբերման՝ 29, անձնական ունեցվածքի գողության` 15, մարմնական վնասվածք պատճառելու՝ 9, զենք-զինամթերքի առգրավման` 5, հոգեկան ներգործության և թմրանյութի իրացման՝ 4-ական, ֆիզիկական ներգործության, խուլիգանության ու ինքնիրավչության՝ 2-ական, մարդու առևանգման, բնակարանային գողության, խարդախության, համակարգչային հափշտակության, գույքը ոչնչացնելու կամ վնասելու, պաշտոնեական լիազորությունները չարաշահելու, ծառերը, թփերը ապօրինի հատելու, սառը զենքի հայտնաբերման, փաստաթղթեր, դրոշմներ, կնիքներ, կեղծելու, ընտանեկան բռնության, ընդերքի պահպանման կամ օգտագործման պահանջները խախտելու, թմրամիջոցի մաքսանենգության, փաստաթղթի կեղծման և աշխատանքային անվտանգության կանոնները խախտելու՝ 1-ական դեպք։

Հայտնաբերվել է 5 հետախուզվող։ Կամավոր ներկայացել է 1 հետախուզվող։

Գրանցվել է զենք-զինամթերքի կամավոր հանձնման 1 դեպք։

Նախկինում կատարված հանցագործություններից բացահայտվել է անձնական ունեցվածքի գողության՝ 3, և մարմնական վնասվածք պատճառելու 1 դեպք։

Անցած 1 օրվա ընթացքում հանրապետությունում արձանագրվել է ճանապարհատրանսպորտային 7 պատահար. 9 մարդ ստացել է տարբեր աստիճանի մարմնական վնասվածքներ: