Մեգան Մարքլը հաղթել է իր խորթ քրոջ դեմ դատական հայցը

Արքայազն Հարիի կինը՝ Սասեքսի դքսուհի Մեգան Մարքլը, հաղթել է իր խորթ քրոջ դեմ դատական հայցը, որը նրան մեղադրել էր զրպարտության մեջ։ Այս մասին հայտնում է New York Post-ը։

58-ամյա Սամանտա Մարքլը քրոջը մեղադրել էր 2021 թվականի մարտին հեռուստահաղորդավարուհի Օփրա Ուինֆրիի հետ հարցազրույցի ժամանակ ԱՄՆ-ում և ամբողջ աշխարհում միլիոնավոր հեռուստադիտողների առջև իր մասին «բացահայտ կեղծ և չարամիտ արտահայտություններ» անելու մեջ: Մասնավորապես, դքսուհու ազգականին զայրացրել էր նրա այն հայտարարությունը, թե ինքը մեծացել է «ընտանիքում որպես միակ զավակ»։ Սամանթա Մարքլն ասում է, որ խորթ քրոջ խոսքերը նվաստացրել են իրեն և ստիպել 75 հազար դոլարի հայց ներկայացնել Ֆլորիդայում։

Մարտի 30-ին դատավոր Շարլին Էդվարդս Հոնիվելն ասաց, որ Մեգան Մարքլի հարցազրույցում առանձնահատուկ բան չի տեսնում և մերժել է հայցը։ Նա հայտարարել է, որ Սասեքսի դքսուհու արտահայտածն իր անձնական կարծիքն է և չի կարող գնահատվել որպես չարամիտ սուտ։

Մեղադրող կողմի փաստաբան Փիթեր Տիկտինը նույնպես փորձել է ապացուցել, որ Մեգան Մարքլը արշավ է կազմակերպել՝ վարկաբեկելու իր քրոջն ու հորը՝ իր PR-ի համար։ Նրա կարծիքով՝ հանուն դրա, նա վատ է խոսում հարազատների մասին, թեև իրականում «նրանց հետ ոչ մի խնդիր չի ունեցել»։

Իր հերթին Սասեքսի դքսուհու փաստաբան Մայքլ Քեմփը հայտարարել է, որ Սամանտա Մարքլի և նրա փաստաբանի մեղադրանքները վիրավորական են Մեգանի համար և պահանջել է անհապաղ փակել գործը։ Նա նաև նշել է, որ Մեգան Մարքլի քույրը վիճարկում է իր սեփական մանկության հիշողությունները, որոնք ընդհանրապես չեն կարող պաշտոնական վարույթի առարկա լինել։ Դատարանը համաձայնել է այս փաստարկներին։

Սամանտա Մարքլը Սասեքսի դքսուհի Մեգան Մարքլի հորական կողմից խորթ քույրն է։