Վարսերում կառուցվում է խմելու ջրատարի ներքին ցանց

Գեղարքունիքի մարզի Սևան համայնքի Վարսեր գյուղում Հայաստանի տարածքային զարգացման հիմնադրամի «Ջրային ծրագրերի իրականացման մասնաճյուղի» կողմից կառուցվում է խմելու ջրատարի ներքին ցանց՝ 6 կիլոմետր 700 մետր երկարությամբ։

Ինչպես «Արմենպրես»-ին տեղեկացրեց «Տրանսշին» ՍՊԸ ներկայացուցիչ Գաբրիել Խաչատրյանը, շինարարական աշխատանքները մեկնարկել են 2022 թվականի սեպտեմբերից և ավարտի կհասցվեն առաջիկա ամիսների ընթացքում։ Ծրագրի պայմանագրային արժեքը կազմում է շուրջ 90 միլիոն դրամ։

2023 թվականի ապրիլի 6-ի դրությամբ արդեն իրականացվել է շինարարական աշխատանքների մոտ 70 տոկոսը։

Ծրագրի իրականացման շրջանակներում կառուցվում են նաեւ դեպի բնակարաններ միացվող գծերը, տեղադրվում են հաշվիչներ։

«Ծրագրի իրականացման արդյունքում Վարսերում 170 տնտեսություն կապահովվի խմելու մշտական և մաքուր ջրով՝ ազատվելով շարունակ կրկնվող վթարներից, մաշված ցանցում առկա կորուստներից»,-նշեց Վարսերի վարչական ղեկավար Հուսիկ Սեդրակյանը։