Սյունիքի մարզում 40 կրթահամալիր կկառուցվի, որոնցից 7-ը՝ Կապանում

2023 թվականի պետական բյուջեով ՀՀ ԿԳՄՍ նախարարությանը հատկացված միջոցներից 440 մլն դրամ կուղղվի Սյունիքի մարզում կառուցվելիք թվով 40 կրթահամալիրների նախագծանախահաշվարկային աշխատանքների և փորձաքննության համար։ Որոշումն ընդունվեց Կառավարության այսօրվա նիստում։ Նախատեսվում է 40 կրթահամալիրներից 7-ը հիմնել Կապանում, 33-ը՝ Սյունիքի մարզի մյուս 7 խոշորացված համայնքում:

«Նախագծով նախատեսվում է գումար հատկացնել ինչպես ՆՆՓ ձեռքբերման, այնպես էլ դրանց տեղակապման և փորձաքննության համար: Կրթահամալիրները բաժանվել են 4 խմբի՝ ըստ հզորությունների և տիպի: Ընդհանուր կառուցվելու է 36 կրթահամալիր, 3 մոդուլային դպրոց, որոնք արդեն կառուցման փուլում են, և Տեղի թիվ 1 դպրոցը, որի շենքային պայմանները լավ վիճակում են, վերափոխվելու են կրթահամալիրների»,-նշված է նախագծի հիմնավորման մեջ:

Բերելով Արագածոտնի մարզի մի շարք բնակավայրերում արդեն իսկ կառուցված մոդուլային դպրոցների թերլրացվածության օրինակներ՝ Փաշինյանը նշեց, որ կրթական ծրագրերի զարգացմանը՝ մասնավորապես մոդուլային դպրոցների կառուցմանը զուգահեռ պետք է համայնքային զարգացման ծրագրեր իրականացվեն։

Ըստ Փաշինյանի՝ դպրոցներից բացի, ամբուլատորիաները ևս պետք է ուշադրության կենտրոնում լինեն, որպեսզի գյուղական բնակչությանը հնարավոր լինի գյուղերում պահել։