ՀՀ իշխանությունները կոնյակի տակառների վրա ստորագրություններ են թողնում՝ փոխանակ մեր պաշտպանությամբ զբաղվեն. Սեյրան Օհանյան

«ՀՀ-ն Լաչինի միջանցքին կապող նոր՝ Կոռնիձոր-Տեղ ավտոճանապարհի շահագործման հանձնելու բերումով տեղի է ունենալու դեպի Լաչինի միջանցք երթուղու փոփոխություն, ինչի արդյունքում Հայաստան-Ադրբեջան սահմանի մոտ 12 կիլոմետրանոց հատվածի պահպանությունը պիտի ստանձնեն ՀՀ սահմանապահ զորքերը»:

Այս մասին այսօր Կառավարության նիստի ժամանակ ասել է ՀՀ վարչապետ Նիկոլ Փաշինյանը՝ անդրադառնալով Տեղ-Կոռնիձոր ավտոճանապարհի շահագործմանը: Վերջինիս փոխանցմամբ՝ պատճառն այն է, որ մինչ այդ սահմանի նշված հատվածի անմիջական պահպանություն չէր իրականացվում ո՛չ Հայաստանի, ո՛չ Ադրբեջանի կողմից նախորդ տարի ձեռք բերված պայմանավորվածության համաձայն՝ Լաչինի միջանցքի ժամանակավոր երթուղին ապահովելու համար: Եվ ահա, սահմանի անմիջական պահպանության ստանձնման ժամանակ որոշակի խնդիրներ են առաջացել, ինչի մասին տեղեկացրել էր ԱԱԾ-ն՝ ընդգծելով, որ երկու կողմերի տեղակայման ընթացքում ի հայտ են եկել քարտեզների տարընթերցումներ:

Այս մասին Լուրեր.com-ի հետ զրույցում ԱԺ «Հայաստան» խմբակցության ղեկավար Սեյրան Օհանյանն ասում է․

«Մենք նորից գալիս ենք այս եզրակացությանը, որ ՀՀ-ն, նրա իշխանություններն ու նրանց ենթակա կառույցները միշտ ուշանում են, այսինքն՝ նախկինում թույլ տված սխալներից հետևություններ չեն անում: Եթե նշված հատվածը չէր պահպանվում և ծրագրի մեջ կար ապրիլի 1-ից նոր ճանապարհի շահագործում և դիրքերի տեղադրում, ապա դրանից գոնե մեկ ամիս առաջ պետք է նախապատրաստական աշխատանքներ տարվեր, գծվեր համապատասխան ծրագիր ու դրա համաձայն կանխավ պատրաստ լինեինք այն միջոցառումներին, որոնք պետք է ուղղված լինեին մեր սահմանի վրա դիրքերի տեղադրմանը:

Հետևությունը մեկն է՝ կրկին վազում ենք հետևանքների հետևից: Այս իշխանությունները հետևություններ չեն անում ու չեն կարողանում կանխարգելել, որն էլ հետևանքն է նրա, որ հակառակորդի հնարավոր գործողություններին ճիշտ գնահատական չի տրվում, հակառակ դեպքում՝ կորոշվեին նաև առաջնահերթությունները՝ սահմանների ճշգրտում, ԼՂ ճանապարհաշինարարության ավարտ, Արցախը բլոկադայից հանել»,- նկատում է նա:

Օհանյանի նշմամբ՝ ներկայիս իշխանությունները գնում են կոնյակի նկուղներ ու տակառների վրա ստորագրություններ թողնում, որ չմոռանան այդ օրն ու թողած ստորագրությունը, ինչպես դա արեցին Երևանի կոնյակի գործարանում 2018 թվականին ու դա այն դեպքում, երբ նրանք առաջին հերթին պետք է զբաղվեն մեր պաշտպանությամբ:

«Մենք գործ ունենք մի թշնամու հետ, որից ամեն բան հնարավոր է սպասել, որովհետև նրանց կողմից բարձրացված խաղաղության թեզը կեղծ է: Մի կողմից հայկական կողմն ասում է՝ ամեն գնով գնալու ենք խաղաղության, որին բոլորս ենք ձգտում, սակայն ոչ ամեն գնով, որովհետև այն կարող է լինել ի հաշիվ մեր շահերի, օրինակ՝ մեր տարածքների, մյուս կողմից էլ՝ շարունակվում են հակառակորդի կողմից սադրանքներն ու սահմանային խախտումները»,-ասաց Օհանյանն ու հավելեց, որ պարզ է՝ այն հակառակորդը, որը չի ուզում խաղաղություն, նշանակում է, որ նրա խաղաղության թեզը ևս խաբկանք ու մոլորություն է, այսինքն՝ խաբում են ՀՀ իշխանություններին, իսկ նրանք էլ հետևություններ չեն անում ու այսքան  ասելուց հետո էլ դա չի լինելու, որովհետև չունեն այնպիսի քարտեզներ ու ուղեղներ, որոնք կօգնեն հասկանալ, թե որտեղ է բաց մնացել, որ լրացնեն այն: