ՀՀ ներկայիս իշխանությունն անկեղծ չէ, երբ ասում է՝ ՀՀ և ԼՂ ժողովրդի անվտանգությունն իր համար առաջնային է. ընդդիմադիր պատգամավոր

«Հայաստանում ՀԱՊԿ խաղաղապահների հնարավոր տեղակայման ժամկետները կախված են հայկական կողմից: Ռուսական կողմը բավարարված է, որ Հայաստանը պահպանում է ՀԱՊԿ խաղաղապահներին ընդունելու շահագրգռվածությունը։ Համոզված ենք, որ այդ քայլը կնպաստի տարածաշրջանում իրավիճակի կայունացմանը»:

Այս մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։ Հիշեցնենք, որ մարտի 31-ին ՀԱՊԿ-ը վերահաստատել էր հայ-ադրբեջանական սահման առաքելություն ուղարկելու պատրաստակամությունը:

Անդրադառնալով թեմային՝ ԼՈՒՐԵՐ.com-ի հետ զրույցում ԱԺ «Հայաստան» խմբակցության պատգամավոր Քրիստինե Վարդանյանը նկատում է՝ բոլորը գիտեն, որ ՀԱՊԿ ասելով առաջինը հասկանում ենք Ռուսաստան և, երբ նրա ԱԳՆ խոսնակն ու նախարարը, հատկապես վերջին ժամանակահատվածում նշում են, որ պատրաստակամ են զորախումբ ուղարկել հայ-ադրբեջանական սահման, նշանակում է, որ վերջնականապես եկել են այդ որոշմանը:

«Այստեղ հարցն այլ է՝ ՀՀ-ն ցանկանո՞ւմ է այդ առաքելության տեղադրումն ու արդյոք դրա կարիքն ունե՞նք, թե՞ Հայաստանի ներկայացուցիչները ցանկանում են հակառուսական աղմուկ բարձրացնել ու վնասնել եղած դաշնակցային հարաբերությունները: Եթե մենք գտնում ենք, որ 200 ԵՄ դիտորդները, որոնք զինված են հեռադիտակներով, կարող են օգնել և լուծել անվտանգային որոշակի խնդիրներ, ապա խնդիրը ո՞րն է, որ ՀԱՊԿ առաքելության տեղադրման հարցում խնդիրներ ենք ստեղծում ու նախապայմաններ դնում, հետևաբար հարց է առաջանում՝ ունե՞նք դրա կարիքը, թե՞ ոչ և, եթե ունենք, ապա ինչու օր առաջ դա չի տեղակայվում, երբ դրա պատրաստակամությունը ևս կա: Մենք անգամ Թուրքիայի հետ բանակցությունների ժամանակ կարմիր գծեր չենք դնում, այդ դեպքում ՀԱՊԿ-ի պարագայում ո՞րն է դրա իմաստը: Դուրս է գալիս, որ գնդակը Հայաստանի դաշտում է, սակայն իշխանությունները դա գցում են ձորը: Չեմ կարծում նաև, որ նրանք անկեղծ են իրենց այն հայտարարություններում, որտեղ ասում են՝ ՀՀ և ԼՂ ժողովրդի անվտանգությունն իրենց համար առաջնային է»,- նշում է նա:

Վերջինիս դիտարկմամբ՝ մեր անվտանգային խնդիրները վերջնական կերպով կարող են լուծել միայն հայկական ուժերը, սակայն հասկանալի է, որ ներկայումս այդ ուժերի մասով խնդիր ունենք:

«Այժմ այնպիսի իրավիճակում ենք, որ ՀՀ ԶՈՒ-ն ի վիճակի չէ ապահովել ՀՀ և ԼՂ անվտանգությույնը, ինչպես դա անում էր առաջ: Սա նշանակում է, որ պետք է լրացնենք, մեր անվտանգային բաժնի բաղադրիչները, որը կարող ենք միայն այն պարագայում, երբ հասկանանք, թե ինչ իրատեսական առաջարկներ ունենք. ներկայումս միայն  ՀԱՊԿ առաջարկն է:

Դուրս է գալիս, որ ունենք խնդիր ու առաջարկ. այս դեպքում իրավունք ունե՞նք հրաժարվել դրանից՝ ասելով, որ հնարավոր է խնդիրներ լինեն: Այսօր 120 հազար արցախցիների անվտանգությունն ապահովում են 2000 ռուս խաղաղապահները: Հարց է առաջանում՝ ՀՀ-ում դրա կարիքը ևս կա՞, թե՞ ոչ:

Նկատելի է, որ իշխանություններն ասում են, որ դա կենսական անհրաժեշտություն է մեզ համար, իսկ ո՞րն է պատճառը դրա ձգձգման: Կարծում եմ՝ դրա տեղակայումը կնպաստի անվտանգության ճարտարապետությանը, սակայն հույսներս պետք է դնենք մեզ վրա, որովհետև ոչ ոք մեր անվտանգության ապահովման համար առաջնային պարտականություններ չունի, բացի ՀՀ ԶՈՒ-ից»,- կարևորում է նա: