Պատերազմը կտևեր այնքան, մինչև ռուս խաղաղապահներ տեղակայվեին Արցախում. քաղաքագետ

Ռուս խաղաղապահների ներկայությունը Լեռնային Ղարաբաղի անվտանգության ապահովման շատ կարևոր տարր է։ Այս մասին օրերս հայտարարել է Արցախի նախկին պետնախարար Ռուբեն Վարդանյանը՝ տելեգրամյան իր եթերում։ Վերջինս նաև նշել էր.

«Ես մարդ եմ, ով չի հավատում փրկիչներին, այլ՝ լիդերներին: Լիդերներին, ովքեր պատրաստ են պատասխանատվություն ստանձնել, առաջ գնալ, առաջնորդել ժողովրդին։ 10-ը տարի առաջ այլ իրավիճակ էր, Արցախում կար ուժեղ իշխանություն, որն իր ձևով կերտեց այն երկիրը, որը ճիշտ էր համարում արցախցիների ապագայի համար։ Ես հավատում էի դրան, օգնում էի նրանց, համարում էի, որ լավ, ճիշտ քայլեր կային։ Միգուցե  իմաստնությունը, գիտելիքը, ինֆորմացիան բավարար չէին»։

ԼՈՒՐԵՐ.com-ի հետ զրույցում քաղաքագետ Գարեգին Միսկարյանը, անդրադառնալով այս հայտարարությանը, ասում է՝ ի վերջո, պետք է հասկանալ, որ պատերազմը կտևեր այնքան, մինչև որ ռուս խաղաղապահ առաքելություն տեղակայվեր Արցախում, որն էլ եղավ:

«Սա նշանակում է, որ ռուս խաղաղապահների բացակայությունը Արցախում, վտանգում է արցախցիների անվտանգությունը, որովհետև դա ինքնին Կրեմլի ծրագրին դեմ գործողություն է: Ռուս խաղաղապահներն այս պարագայում ոչ թե անվտանգության երաշխավոր են, այլ սպառնալիքնների չեզոքացման»,- նկատում է նա:

Վերջինս նշում է՝ մի բան հստակ է՝ Հայաստանի և Արցախի համար միակ ելքային ճանապարհը՝ մնալու հայկական ու պահպանելու ինքնությունը, դա ժողովրդավարության ուղին բռնելն է:

«Վստահաբար, եթե Արցախում ժողովրդավարության կողմնակից քաղաքական ուժերը չկարողանան ազդել տիրող քաղաքական իրավիճակի վրա, ապա ԼՂ-ն, որպես ինքնուրույն միավոր, բավականին շուտ կվերանա ու նույնն էլ, մեծ հաշվով, Հայաստանի դեպքում կլինի: Համենայնդեպս, ներկայիս ջանքերը բավարար են, որպեսզի միջազգային հանրությունը տեսնի այն, թե ինչ է կատարվում Արցախում»,- ասում է նա: