Իշխանությունն իրեն է հարմարեցնում ընտրությունները

Օրերս հայտնի դարձավ, որ Երևանի ավագանին ապրիլի 11-ին արտահերթ նիստ կգումարի, որի օրակարգում լինելու է Երևանի քաղաքապետի ընտրության հարցը: Երևանի ավագանու «Իմ քայլը» խմբակցության ղեկավար Արմեն Գալջյանը հայտնեց, որ նախաձեռնում են սա՝ պահպանելու համար օրենքով սահմանված ընթացակարգը, այն է՝ ընտրության օր նշանակել, որպեսզի խմբակցությունների՝ թեկնածու առաջադրելու իրավունքն ապահովվի: Հարցին՝ հնարավո՞ր է լինեն արտահերթ ընտրություններ, դժվար է պատասխանել:

Անդրադառնալով այս հարցին՝ ԼՈՒՐԵՐ.com-ի հետ զրույցում «Միացյալ Հայաստան» կուսակցության նախագահ Երվանդ Թարվերդյանը ասում է՝ եթե առաջանորդվենք փոխքաղաքապետ Տիգրան Ավինյանի նշած այն դրույթով, ըստ որի, այս մասով իրավաբանները ուսումնասիրում են հնարավորություններն ու 2 ամսվա համար քաղաքապետ ընտրելը այդքան էլ նպատակահարմար չէ, կարելի է ասել, որ իշխանությունը մտածում է օրենքի սահմաններում չանցկացնել արտահերթ ընտրություններ:

«Մենք գիտակցում ենք, որ իշխանությունը ցանկանում է ունենալ քաղաքական օպոնենտ, այսինքն՝ կառուցողական կուսակցություններ, որոնք, եթե անգամ չկիսեն իշխանությունը, կկարողանան բարձրաձայնել խնդիրների մասին ու հեռանալ գոռալու փոխարեն՝ ասել՝ լուծեք առկա խնդիրները: Ճիշտ է, ապրիլի 11-ին պարզ կլինի ամեն բան, սակայն եթե չլինի ավագանու նիստ, ապա ըստ օրենքի, չեն ընթանա արտահերթ ընտրություններ: Եթե նման խելացի քայլ լինի Երևանի քաղաքապետարանի կողմից, ողջունելի է, որովհետև հակառակ դեպքում, կդիտվի, որ իշխանությունն իրեն է հարմարեցնում ընտրությունները: Փաստ է, եթե Երևանի քաղաքապետարանում գնան արտահերթ ընտրությունների, ուրեմն իշխանությունն իրեն է հարմարեցնում ամեն բան՝ անգամ ընտրությունները»,- ասաց նա: