Մի երգի պատմություն․ ինչպես Արսեն Շախունցի` «Девочка, стоп!» երգը դարձավ հիթ

Հայկական շոուբիզնեսի ներկայացուցիչների շրջանում քիչ են այն երգիչ-երգչուհիները, որոնց երգերն ու տեսահոլովակները լայն տարածում են ունենում նաև Հայաստանի սահմաններից դուրս և սիրվում են օտարերկրացիների կողմից։ Այդ սակավաթիվ արտիստներից է երգիչ, երգահան և երաժիշտ Արսեն Շախունցը, ում՝ 2019 թվականին թողարկված  «Девочка, стоп!» կատարումը վիրուսային արագությամբ տարածվեց համացանցում և իսկական հիթ դարձավ։ 

Այս պահի դրությամբ երգը YouTube հարթակում ունի 147 մլն դիտում և 563.000-ի հասնող հավանում։ 2022 թվականին երգը YouTube-ի թոփ հիթեր շարքում զբաղեցնում էր 20-րդ հորիզոնականը։ 
 
Կարելի է ասել, որ երգի նման հաջողությունը գրեթե ամբողջովին կապված է Արսեն Շախունցի հետ, քանի որ երաժշտության, բառերի և գործիքավորման հեղինակը հենց երգիչն է։ 

Երգը մեծ սիրով և ոգևորությամբ է ընդունվել հասարակության ամենատարբեր շերտերի, ինչպես նաև տարբեր ազգության ներկայացուցիչների կողմից, ունեցել է բազմաթիվ տարածումներ և քավր տարբերակներ։ Ժամանակին համացանցում լայն տարածում էր գտել այն թրենդային լուսանկարը, որտեղ Շախունցը հայկական եռագույնով էր, իսկ ձեռքում պահած թղթի վրա գրված էր երգի ամենահայտնի  արտահայտությունը՝ «Չի կարելի շփոթել շալախոն լամբադայի հետ»։ 
 
Մեծ մասսայականություն էր ստացել նաև հայտնի հեռուստահաղորդավարուհի Թինա Կանդելակիի պարը «Девочка, стоп!» երգի ներքո։ Տարածված տեսանյութում երևում էր, որ հաղորդավարուհին մեծ ոգևորությամբ է պարում, իսկ ինքը՝ Կանդելակին, նշել էր, որ իր պարը նվիրում է եղբորը՝ Ալեկոյին։ Դե, իհարկե, ստեղծագործությունը իր անհավանական հաջողությամբ և մասսայականությամբ չէր կարող «անտարբեր» թողնել նաև ադրբեջանցիներին։

Վրաստանում Ադրբեջանի դեսպանատան քարտուղար Վուգար Մուստաֆաևը խնջույքը ծեծկռտուքի էր վերածել, երբ երգիչները ներկաներից մեկի պատվերով կատարել էին Արսեն Շախունցի «Девочка, стоп!» երգը։ Ադրբեջանցի երգիչները՝ Աֆիկ Նովրուզովը և Անաս Ասկերովը, ֆեյսբուքյան ուղիղ եթերում հրապարակել էին դեպքի մանրամասները, ցույց տվել դիվանագետի լուսանկարն ու պահանջել Ադրբեջանի դեսպանից պաշտոնանկ անել նրան:
 
«Девочка, стоп!» կատարումը իսկապես շրջադարձային դեր ունեցավ Արսեն Շախունցի երաժշտական կարիերայում, սակայն, ինչպես ասում են, Շախունցը չմնաց մեկ հիթի երգիչ, այլ այս ստեղծագործությունից հետո թողարկեց նոր երգեր, որոնք կրկին բավականին կարճ ժամանակում դարձան ամենաշատը լսված և պահանջված կատարումները։ Դրանցից կարելի է առանձնացնել, օրինակ, «Гудбай, до свидания» «Бандитка», «С днем рождения!», «Эй, девушка», «А я кайфую» կատարումները, ինչպես նաև Արկադի Դումիկյանի և Սոսո Պավլիաշվիլիի հետ համատեղ դուետները։

Հեղինակ՝ Աննա Մուրադյան