Երեկ Սոթքում զոհված Էդգարը Սիսիանից էր, 35 օրից պետք է զորացրվեր

Երեկ Սոթքում թշնամու կրակոցից զոհված Էդգար Սուլեյմանյանը Սյունիքի մարզի Սիսիան համայնքից էր։ Էդգարը դեռ 20-ը չէր բոլորել, զորացրվելուն մնում էր ընդամենը 35 օր․․․

Էդգարի զոհվելու լուրը ցնցել է նրան ճանաչողներին։

«Երբ լուրն իմացա, փորձեցի հիշել, թե երբևէ դիտողություն արե՞լ եմ Էդգարին, թե ոչ, բայց այդպես էլ նման դեպք չհիշեցի։ Ինքն այնքան զուսպ, համեստ, դաստիարակված տղա էր, որ երբեք առիթ չի տվել իր վրա խոսելու․․․ Հենց այնպես չեմ ասում այս բառերը․․․ Ինքն, իրոք, այդպիսին էր։ Էդգարը մի ուրիշ տեսակ էր, իր աշխարհն ուրիշ էր․․․ ինքնամփոփ էր շատ ու անսահման ընկերասեր, բարի, կազմակերպված․․․»,- «Փաստինֆո»-ի հետ զրույցում ասում է Սիսիանի թիվ 5 հիմնական դպրոցի փոխտնօրեն Լուսինե Նազարյանը։

Դա այն դպրոցն է, որտեղ սովորել է Էդգարը։ Տիկին Նազարյանը հիշում է՝ Էդգարը 9-րդ դասարանն ավարտելուց հետո անմիջապես անցել է աշխատանքի։ Ընտանիքի սոցիալական վիճակը շատ ծանր էր, և տան նեցուկն ինքն էր։

«Շատ-շատ էր աշխատում, քանի որ ընտանիքը սոցիալապես շատ ծանր վիճակում է։ Հիշում եմ՝ դասղեկը միշտ օգնում էր էդգարին՝ ինչով կարողանում էր։ Ոնց որ մայրը կաներ, Աիդա Առաքելյանն այդպես անում էր Էդգարի համար։ Նույնն էլ դասվարն է։ Էդգարենց դասարանում 4 հոգի անապահով ընտանիքից էին, բայց այնպիսի մթնոլորտ էին ստեղծել դասվարն էլ, դասղեկն էլ, որ այդ աշակերտները մշտապես հոգատարությամբ շրջապատված էին․․․ Էդգարին շատ էին հարգում ու սիրում։ Պատկերացրեք, երեկ դպրոցի նախկին տնօրենը՝ Հովիկ Ալեքսանյանը, լուրն իամանուն պես հիվանդանոցից զանգել է ու ասել, որ անպայման ծաղկեպսակ տանենք ․․․ Ուզում եմ ասել, որ Էդգարը բոլորի կողմից սիրված ու հարգված է եղել ու աննկարագրելի մեծ է կորստի ցավը»,-ասում է Նազարյանը։

Էդգարի դասղեկի հետ, ցավոք, չհաջողվեց խոսել․ տիկին Առաքելյանը շատ հուզված էր․․․

Ծնողների ապրումների ու Էդգարի հետ կապած հույսերի մասին անգամ անիմաստ է խոսելը․․․

Էդգարը տան ավագն էր․ իերնց փոքր քույր ու եղբար ունի։

Տիկին Նազարյանի վրա ամենաշատն ազդել է մոր հետևյալ խոսքը․ «այս ցավը ինչո՞ւ է միշտ թակում աղքատների դուռը․․․ Թող որդիս վերջին զոհը լինի․․․»։