ԵԽ. Պայքարը սկսում են աշխարհի փոխչեմպիոն Դավիթ Չալոյանն ու Եվրոպայի չեմպիոն Անի Հովսեփյանը

Լեհաստանում անցկացվող Եվրոպական երրորդ խաղերում հունիսի 25-ին Հայաստանն ունի 11 մասնակից: Այսօր պայքարի մեջ կլինեն բռնցքամարտիկները, ջրացատկորդները, մուայթայի մարտիկները եւ թաեքվոնդոիստները:

Լեհաստանի Կրակով քաղաքում անցկացվող բռնցքամարտի մրցաշարում այսօր ռինգ դուրս կգան Գուրգեն Մադոյանը, Դավիթ Չալոյանը եւ Անի Հովսեփյանը:

71 կգ քաշային Գուրգեն Մադոյանի մրցակիցը կլինի Չեռնոգորիայի ներկայացուցիչ Ստեֆան Սավկովիչը։

Երեկոյան մրցահերթում ռինգ դուրս կգա Եվրոպայի չեմպիոն Անի Հովսեփյանը: Նրա մրցակիցը կլինի Փախստականների օլիմպիական հավաքականը ներկայացնող Քինդի Ջանկե Նգամբան:

Աշխարհի փոխչեմպիոն Դավիթ Չալոյանը մեկնարկում ուժերը կչափի Սերբիայի ներկայացուցիչ Վլադան Բաբիչի հետ:

Հունիսի 25-ին Հայաստանը մասնակից ունի նաեւ ջրացատկի մրցաշարում, որն անցկացվում է Ռզոազռու քաղաքում: 10 մետր աշտարակից սինքրոն ցատկում կմասնակցի Վլադիմիր Հարությունյան - Մարատ Գրիգորյան զույգը:

Այսօր պայքարի մեջ կմտնեն նաեւ մուայթայի Հայաստանի հավաքականի ներկայացուցիչներ Գոռ Սարգսյանը, Նարեկ Խաչիկյանը, Արմեն Գրիգորյանը եւ Լյուաի Տեր-Դավթյանը:

Մինչեւ 67 կգ քաշային Գոռ Սարգսյանը կմրցի լեհ Օսկար Սիեգերտի հետ: Մինչեւ 60 կգ քաշային Նարեկ Խաչիկյանի մրցակիցը կլինի գերմանացի Ֆիլիպ Լեոն Բալբաչը: Մինչեւ 71 կգ քաշային Արմեն Գրիգորյանը ուժերը կչափի Ֆրանսիան ներկայացնող Մեսի Կուբիլայի հետ: 63,5 կգ քաշային կարգում հանդես եկող Լյուսի Տեր-Դավթյանն էլ կմրցի չեխ Թերեզա Ստեչովայի հետ:

Խաղերում թաեքվոնդոյի Հայաստանի միակ ներկայացուցիչ  Սարգիս Սարգսյանը մեկնարկում պարտվել է Իսպանիայի ներկայացուցիչ Դանիել Բարերային եւ լքել պայքարը:

Եվրոպական խաղերում Հայաստանն արդեն նվաճել է երեք մեդալ հրաձգությունից, կարատեից եւ շախմատից: Հրաձգության 10 մետր օդամղիչ ատրճանակ միքս մրցաձեւում Էլմիրա Կարապետյան - Բենիկ Խլղաթյանը զույգը թիմային պայքարում երկրորդ տեղն է զբաղեցրել, նաեւ 581 միավորով գրանցել Եվրոպական խաղերի ռեկորդ:

Կարատեում Անիտա Մակյանը մինչեւ 68 կգ քաշայինների պայքարում դարձել է բրոնզե մեդալակիր: Երկու հաղթանակ տանելուց հետո նա կիսաեզրափակիչում 0:4 հաշվով պարտվել էր Շվեյցարիայի ներկայացուցիչ Ելենա Նորինային:

Շախմատի Հայաստանի թիմը նվաճել է Կրակովում անցկացված կայծակնային շախմատի Եվրոպայի զույգ առաջնության չեմպիոնի տիտղոսը: Հայաստանի թիմում էին Շանթ Սարգսյանը և Էլինա Դանիելյանը: