ՀՀ փոխվարչապետը բարձր է գնահատել ԱՄՆ-ի դերը ՀՀ-ում

ՀՀ փոխվարչապետ, տարածքային կառավարման նախարար Արմեն Գևորգյանն այսօր մասնակցել է «Հանրային երկխոսություն և համայնքային զարգացում» խորագրով համաժողովի բացմանը:

Համաժողովի նպատակն է ներկայացնել ԱՄՆ միջազգային զարգացման գործակալության ֆինանսավորմամբ «Քաունթերփարթ ինթերնեշնլ» կազմակերպության կողմից իրականացվող Քաղաքացիական հասարակության և տեղական ինքնակառավարման աջակցության քառամյա ծրագրի միջանկյալ արդյունքները:

Պետական կառավարման, հասարակական և միջազգային կազմակերպությունների ներկայացուցիչների, մարզպետների, ծրագրում ընդգրկված 43 համայնքների ղեկավարների և ավագանու անդամների մասնակցությամբ կքննարկվեն համայնքների երկարաժամկետ ռազմավարական պլանավորմանը, տեղական ինքնակառավարման և ապակենտրոնացման հետագա զարգացման ազգային ռազմավարությանը, հանրային-մասնավոր ոլորտների համագործակցությանը, համայնքի զարգացման ապահովման գործում արտաքին ռեսուրսների ներգրավմանը վերաբերող հարցեր:

«Արդեն շուրջ 15 տարի է, ինչ ԱՄՆ կառավարությունը Հայաստանում աջակցում է տեղական ինքնակառավարման մարմինների հզորացմանն ու կայացմանը, ինչպես նաև ապակենտրոնացման բարեփոխումներին: Սա հնարավորություն է տալիս խոսել արդեն կայացած, երկարաժամկետ ու շարունակական համագործակցության ու փոխվստահության մասին:

ՀՀ և ԱՄՆ կառավարության փոխգործակցությունը նշված ոլորտում եղել է աճողական, տարեցտարի ավելացվել են ծրագրերի ծավալները, գործընկեր համայնքների թիվը, իրականացված միկրո-ծրագրերի քանակն ու ինստիտուցիոնալ հզորացման շրջանակները: Սկսած 1998թ. ԱՄՆ ՄԶԳ ծրագրերը հաջորդել են մեկը մյուսին համարյա անընդմեջ: Ներկայումս Քաունթերփարթի ծրագրերը իրականացվում են Հայաստանի բոլոր մարզերում, 43 գյուղական և քաղաքային համայնքներում»,- ասել է Արմեն Գևորգյանը: