Քոչարյանի անսպասելի քայլը

Նախագահական ընտրություններին ընդառաջ՝ անդրկուլիսային հանդիպումների համար ցամաքն այլևս չի բավականացնում. քաղաքական խաղացողներն արդեն նախընտրում են երկինքը: Երբ պաշտոնական այցով Չեխիայում գտնվող ԱԺ պատվիրակությունը նստում է ինքնաթիռ՝ հայրենիք վերադառնալու համար, ներս է մտնում Ռոբերտ Քոչարյանը: Ականատեսների ասելով՝ Արգամիչը հանկարծակիի է գալիս, բայց ելք չկար: Պատգամավորներից Արտակ Զաքարյանը, ով հավանաբար ԱԺ նախագահի կողքն էր նստած, իր տեղը զիջում է Քոչարյանին: Ուղևորությունը տևում է 3,5 ժամ:

Հովիկ Աբրահամյանն այսօր նախ հաստատեց իր և Ռոբերտ Քոչարյանի հանդիպումը, ապա հայտարարեց, որ իր նպատակն այն է, որ իրենք՝ ՀՀԿ-ն և ԲՀԿ-ն, համերաշխ գնան ընտրությունների:

Ստացվում է, որ նախագահական ընտրություններին ընդառաջ Հայաստանի քաղաքական օրակարգի թիվ մեկ խնդիրը «համերաշխության ապահովումն է»: Մնում է պարզել, թե ով է ում հետ համերաշխ լինելու և ինչի հաշվին:

Ինքնաթիռում Քոչարյանի հայտնվելը պատահականություն լինել չէր կարող: Երկրորդ նախագահն այն մարդը չէ, որ այստեղ-այնտեղ թրև գա՝ առանց ճշտումների: Նա միանշանակ իմացել է, որ այդ ինքնաթիռում է լինելու նաև ԱԺ նախագահը և որոշել է նրան փաստի առաջ կանգնեցնել: Ասում են, թե վերջին շրջանում Աբրահամյանն այդքան էլ ջերմ հարաբերությունների մեջ չէր էքս-նախագահի հետ. Քոչարյանն իր վերջին «հայտնության» ժամանակ հայտարարել էր, թե Օսկանյանին անձեռնմխելիությունից զրկելը «խորհրդարանի ինքնավարկաբեկման ցցուն դեպք է», ինչը, բնականաբար, չէր կարող ԱԺ նախագահի սրտով լինել: Երկրորդ նախագահը ստույգ հաշվարկ է կատարել. «երկրային» հանդիպում նշանակելու դեպքում Աբրահամյանը կարող էր խույս տալ (օրինակ՝ Գագիկ Բեգլարյանն իր կյանքի օրհասական շրջանում, երբ պաշտոնանկ արվեց նախագահականի աշխատակցին ծեծելու պատճառով, ամեն կերպ խուսափում էր Քոչարյանի հետ հանդիպումից՝ ավելորդ խոսակցությունների տեղիք չտալու համար), երկնքում Արգամիչին առնվազն պետք էր գոնե նախապես օդապարիկի մասին հոգ տանել: Նախագահի օգնականներից մեկը պատմում էր, որ նախագահի ուղևորությունների ժամանակ մեր օլիգարխներից ոմանք, նախապես ճշտելով, հաստատվում էին նախագահի հետ նույն հյուրանոցում, որպեսզի ֆոյեում Սարգսյանը տեսներ ու գոնե մի հատ «Ա՛յ տղա՞, էս ի՞նչ ես անում ստեղ»-ի արժանացներ:

Հովիկ Աբրահամյանն ասում է, թե ուղղակի իրար կողք են նստել ու դեսից-դենից զրուցել՝ քաղաքական թեմայով բան չեն խոսել: Դե, իհարկե, երկնքում ամեն ինչ հնարավոր է: Անգամ հնարավոր է, որ ամբողջ 3,5 ժամ ՀՀ քաղաքական դաշտի երկու լուրջ ֆիգուրները զրույցներ վարեն բացառապես որսորդությունից ու կանանց բարեմասնություններից: Առանց այն էլ, վերջին շրջանում Հովիկ Աբրահամյանի ամենասիրած արտահայտությունը դարձել է «քաղաքականության մեջ ոչինչ չի կարելի բացառել»-ը: Բայց, քանի որ մենք հակված չենք ո՛չ Հովիկ Աբրահամյանի, ո՛չ Ռոբերտ Քոչարյանի հաշվով անլրջություն թույլ տալ, շատ ավելի տրամաբանական է անլուրջ թեմաներով զրույցների բացառումը գոնե այս գործիչների պարագայում: Եվ ուրեմն, կարելի է միանշանակ ասել, որ 3,5 ժամի գոնե 1 ժամը հենց քաղաքական թեմայով լուրջ խոսակցություն է եղել, ըստ երևույթին՝ «համերաշխության» թեմայով:

Հանդիպման նախաձեռնողը Քոչարյանն էր: Նախաձեռնողը Քոչարյանն էր, ուրեմն ասելիք ունեցողը ևս նա էր: Իսկ նախկին նախագահն իր նախկին ենթակային հանկարծակիի բերելով՝ նրա հետ ինքնաթիռում գտնվող պատվիրակության անդամների ներկայությամբ ցույց է տալիս, որ ինքն ամեն ինչից տեղյակ է, բոլորն իր տեսադաշտում են և որ ինքը ոչ մի տեղ չի կորել և ցանկացած պահի կարող է հայտնվել:

Խորհրդարանական ընտրություններում Աբրահամյանը ղեկավարում էր ՀՀԿ շտաբը: Ասում են, թե Աբրահամյանին է վստահվում այդ հույժ կարևոր գործը, քանի որ նրանից լավ ոչ ոք չի կարող ընտրություն կազմակերպել և արդյունք ապահովել: Ասում են, թե Աբրահամյանն անգամ գյուղապետարանի աշխատակիցներին՝ սկսած քարտուղարուհիներից, լավ ճանաչում է: Իր՝ նման մեծ պոտենցիալ ունենալն ու հույժ կարևոր անձնավորություն լինելն Աբրահամյանն այսօր էլ հաստատեց մեր հարցին ի պատասխան՝ ՀՀԿ շտաբի պետի պաշտոնում «ինքնառաջադրման» կարգի մի բան թույլ տալով՝ «հաշվի առնելով, որ ես ունեմ մեծ փորձ և ոչ մի անգամ իմ ղեկավարած շտաբը չի ձախողել իր աշխատանքները...»:

Այն, որ Հովիկ Աբրահամյանն իսկապես կարող է որոշ դերակատարություն ունենալ ընտրություններում, գիտի նաև նրա նախկին շեֆը՝ Ռոբերտ Քոչարյանը: Քոչարյանը գիտի նաև, որ Հովիկ Աբրահամյանն ի սկզբանե իր կադրն է: Այդ մասին գիտի նաև Սերժ Սարգսյանը:

Խորհրդարանական ընտրություններում Աբրահամյանին շտաբի պետ նշանակելով՝ ՀՀԿ ղեկավարը ապահովության համար շտաբ գործուղեց նաև իր ամենավստահելի մարդուն՝ Միքայել Մինասյանին՝ շտաբի պետի տեղակալի կարգավիճակով: Մինասյանի ֆունկցիաներից մեկը Աբրահամյանին վերահսկելն էր: Այսինքն՝ դեռ այն ժամանակ արդեն իսկ կասկածի տակ էր դրված Աբրահամյանի վստահելիությունը: Տևական ժամանակ Հովիկ Աբրահամյանն ինքն իրեն Հայաստանի քաղաքական դաշտի մի այլ level-ի խաղացող է համարում, ինչի վկայությունն է նաև այն, որ ԲՀԿ-ին հնազանդեցնելու գործն իբր ապահովելու է ԲՀԿ նախագահի խնամի ԱԺ նախագահը:

«Մենք պատրաստ ենք համագործակցության նախագահական ընտրություններում, ուղղակի ողջամիտ յուրաքանչյուր առաջարկություն մեզ համար կարող է լինել ընդունելի, քննարկելի և մենք պատրաստ ենք ընդունել, քննարկել, բայց դա չի կարող լինել մեր արժանապատվության հաշվին: Ես նկատի ունեմ Հանրապետական կուսակցության»,- այսօր հայտարարեց ԱԺ նախագահը:

ԱԺ նախագահը հաստատեց նաև այն տեղեկությունը, որ նախագահական ընտրությունների հետ միաժամանակ կարող է նաև սահմանադրական հանրաքվե անցկացվել, որի նպատակը փոխվարչապետի ինստիտուտին նոր կարգավիճակ շնորհելն է: Իսկ դա, ինչպես հայտնի է, հենց այն գինն է, որ պատրաստ է վճարել ՀՀԿ-ն՝ ԲՀԿ-ի հետ «համերաշխության» համար՝ գումարած մի երկու նախարարական ու մարզպետական պորտֆել:

Դատելով Աբրահամյանի՝ «բայց դա չի կարող լինել մեր արժանապատվության հաշվին» արտահայտությունից, կարելի է ենթադրել, որ նման կարգի առաջարկություններ էլ են արվում: Չի բացառվում, որ նման առաջարկություն Աբրահամյանը ստացել է բոլորովին վերջերս, քանի որ Հայաստանում այդքան էլ շատ մարդ չկա, որ համարձակվի Արգամիչի «արժանապատվության հաշվին» արտահայտություն թույլ տալ: Եվ ուրեմն, արդեն իսկ հաստատված կարելի է համարել այն, որ գոնե երկնային մակարդակում լուրջ խոսակցություն է ընթացել ՀՀԿ-ԲՀԿ (Ռոբերտ Քոչարյանի ստեղծած կուսակցության)՝ նախագահական ընտրություններին «համերաշխ» մասնակցության վերաբերյալ, որի մանրամասները դեռևս հայտնի չեն, սակայն մի բան պարզ է՝ նախաձեռնությունը եղել է Քոչարյանի կողմից և նույն անձնավորության կողմից արվել է այնպիսի առաջարկություն, որ ստացողի համար կարող է արժանապատվության հետ կապված խնդիրներ առաջացնել:

Լուսինե Կեսոյան