Marianne. Վրացական ղեկավարության ֆրանսիական արմատները

Marianne ֆրանսիական ամսագրում լույս տեսած հայազգի լրագրող Աննա Դեսթակյանի հոդվածը սկսվում է այն հարցով, թե արդյոք Վրաստանը դարձել է ֆրանսիական գաղութ: Բանն այն է, որ կովկասյան հանրապետության նոր վարչապետն ունի ֆրանսիական անձնագիր, և ոչ միայն նա. նախկին կառավարության անդամների մեծ մասն էլ ուներ ֆրանսիական քաղաքացիություն: Այս ընդդիմադիրը, ում ներկայացնում են որպես ռուսամետ քաղաքական գործիչ, վերջերս խորհրդարանական ընտրություններում հաղթանակ է տոնել պետության ղեկավար Միխեիլ Սաակաշվիլիի ճամբարի նկատմամբ: Միևնույն ժամանակ ֆրանսերենին լավ տիրապետող երկրի ղեկավարին խորհրդատվություններ է տալիս փիլիսոփա Անդրե Գլյուքսմանի որդին: Իսկ ահա երկրի նախկին ԱԳ նախարարներից մեկը իր նշանակումից առաջ եղել է Թբիլիսիում Ֆրանսիայի դեսպանը:

56-ամյա միլիարդատեր Բիձինա Իվանիշվիլին ֆրանսիական քաղաքացիություն է ստացել 2010թ.: Նա ծնվել է խորհրդային Վրաստանում և սովորել է Մոսկվայում, որտեղ կուտակել է իր հարստությունը ԽՍՀՄ-ի փլուզումից և ռուսական անձնագիր ստանալուց հետո: 1990-ական թվականներին նա 6 տարի ապրել է իր կնոջ՝ Եկատերինայի (ևս վրացի) հետ, Փարիզից քիչ հեռու: Այնտեղ ծնվել են նրանց չորս երեխաները, և իր կնոջը ևս տվել են քաղաքացիություն: Իվանիշվիլին ինքը վերադարձել է Վրաստան 2004թ.: Իսկ որպեսզի իր երեխաները կարողանան շարունակել իրենց կրթությունը Թբիլիսիում, նա ֆինանսավորել է ֆրանսիական դպրոցի կառուցումը (190 աշակերտներ, 25 ազգություններ): Նման առատաձեռնության պարագայում Ֆրանսիայի դեսպանը առաջարկել է նրան քաղաքացիություն ստանալու համար դիմում ներկայացնել: