«168 ժամ». Ես երբևէ դավադրությունների տեսության կողմնակիցը չեմ եղել. Նաիրա Զոհրաբյան

«Ես բազմիցս ասել եմ, որ ԲՀԿ-ն չէ լուրջ քաղաքական որոշումներ կայացնողը, ավելին՝ այդ որոշումները Հայաստանում չեն կայացվում. որոշումները կայացվում են հյուսիսում և փոխանցվում են ԲՀԿ- ին»,- երեկ կայացած ասուլիսում հայտարարել է Դավիթ Շահնազարյանը՝ պատասխանելով հարցին, թե ինչի՞ է ուզում հասնել ԲՀԿ նախագահ Գագիկ Ծառուկյանն իր լռությամբ:

«Ինչ վերաբերում է Ձեր ասած նիստին, որը, կարծեմ, երեք ժամ տևեց, ապա, ինչո՞ւ ոչ, հնարավոր է՝ փորձ են անում տպավորություն ստեղծել, որ իրենք իրենց քաղխորհրդով են որոշումներ կայացնում: Չեմ բացառում նաև այդ տարբերակը,- ասել է Դ. Շահնազարյանը՝ ավելացնելով,- Ես վստահ եմ, որ Ռուսաստանի կողմից որոշումը դեռևս կայացված չէ: Դա կախված կլինի նրանից, թե ի՞նչ պայմանավորվածություններ ձեռք կբերվեն ՀՀ իշխանությունների հետ, կամ արդյոք ձեռք կբերվե՞ն, թե՞ ոչ»:

Ի պատասխան Դ. Շահնազարյանի վերոնշյալ հայտարարություններին, Աժ ԲՀԿ խմբակցության քարտուղար Նաիրա Զոհրաբյանն երեկ «168 ժամ»-ի թղթակցին ասել է. «Դավիթ Շահնազարյանը չի մոռացել երևի իր նախկին պաշտոնը, որը ենթադրում էր դավադրությունների տեսության պրոֆեսիոնալիզմի ցուցաբերում: Ես երբևէ դավադրությունների տեսության կողմնակիցը չեմ եղել և աշխատում եմ վերլուծել ու արձագանքել սթափ դատողություններին և ոչ թե նրանց, ում դատողությունների հիմքում ընկած են բացառապես դավադրությունների տեսությունները»: